Каннаваронинг футболчиларга муносабати ва бошқа кўплаб мавзулар. Аббосбек Файзуллаев Россия нашрига катта интервю берди (2-қисм)
— Ўзбекистонда ҳар қандай орзу амалга ошиши мумкинлигини исботлаётган футболчи бор — Абдуқодир Ҳусанов. Бу сиз учун намунами?
— Унинг тақдири — Ўзбекистондаги барча футболчилар учун жуда катта мотивация. Ва сен қаердан бўлишингдан қатъи назар — ҳатто Ўзбекистоннинг кичкина шаҳарчасидан бўлсанг ҳам — энг жасур орзулар ушалиши мумкинлигига исботдир. Агар бунга ишонсанг ва қаттиқ ҳаракат қилсанг, ҳамма нарса содир бўлиши мумкин.
— У расман "Манчестер Сити"нинг мавсумдаги энг яхши уч нафар футболчиси қаторига кирди. Унинг тақдиридаги бундай бурилиш сиз учун шок бўлдими?
— Йўқ. Биз у билан жаҳон чемпионатида, фақат ёшлар ўртасидаги мусобақада бирга ўйнаганмиз. Ўша пайтдаёқ унинг албатта топ-5 лигага тушишини ҳис қилгандим. Чунки унда жисмонaн жуда кучли, ўйиндаги ишонч ва агрессивликни эса Абдуқодир ўшандаёқ кўрсатиб бўлган эди.
— Ўзига бўлган ишончни йўқотиб қўймаслик, айниқса, "Сити"даги омадсиз биринчи ўйиндан кейин синиб қолмаслик учун қандай менталитетга эга бўлиш керак?
— Агар унинг ўрнида бошқаси бўлганида, биринчи ўйинда ундан яхшироқ ўйнай олармиди, билмайман. Бундай ёшда ким ҳам ҳаяжонланмайди дейсиз — ахир янги лига, янги клуб, ҳаётдаги янги босқич ва янги даража. Ва бирданига "Челси"га қарши бошлаш — бу жуда қийин. Аммо биринчи хатодан кейин Абдуқодир ўзини қўлга олди ва ўзини жуда яхши кўрсата бошлади.
— Гвардиола ҳақида бирор нарса гапириб бердими?
— Тўп билан кўп машғулот ўтказишлари ва тактика билан шуғулланишларини айтди.
— Ҳусанов умуман интервью бермайди, ҳатто Ўзбекистон ОАВларига ҳам. Жамоада ҳам у журналистлар билан бўлганидек камсуқумми ёки бошқача?
— Ҳа, у жуда камсуқум ва тинч йигит. Ҳамма билан ҳам очилавермайди, фақат яқин инсонлари билан гаплашади.
— Сиз у билан яқин дўстмисиз?
— Ҳа. Бизда U-20 терма жамоасида бирга ўйнаган тўртта йигитдан иборат "банда"миз бор.
Челестини қолишимни хоҳлаганди
— ЦСКАдан кимлар билан алоқани сақлаб турибсиз?
— Ҳа, кўпчилик билан. Лукин, Кисляк, Мойзес, Гуарирапа, Давила, Круговойлар билан гаплашиб турамиз... Йигитлар омад тилашяпти — ва яхши иштирок этишимни сўрашяпти. Кечагина Мойзес ёзганди.
— Бу мавсумда ЦСКАнинг ўйинларини кузатиб бордингизми?
— Деярли ҳар бир ўйинини томоша қилдим!
— Сизни бир нечта тилларни билади дейишади. Испан тилини ҳамми?
— Ҳа, испан тилини билардим, лекин ўтган йили дарсларни тўхтатиб қўйдим — негалигини ўзим ҳам билмайман. Ҳозир шу сабабли кўплаб сўзларни унутяпман. Шунинг учун ўрганишда давом этишим керак.
— ЦСКАдаги биринчи мавсумингиз ажойиб чиққанди. Аммо иккинчи мавсум давомида бош мураббий Николич тактикани ўзгартира бошлади ва унинг ромб шаклидаги янги схемасида сизга жой топилмади.
— Ҳа. Биринчи даврада, менимча, яхши даражада ўйнадим, голлар урдим, голли узатмалар бердим — адашмасам, 3+6 эди. Чунки ўз позициямда майдонга тушардим. Лекин кейин, йиғинлардан сўнг, мураббий тактикани ўзгартирди, ярим ҳимояни ромб шаклида қура бошлади ва бу менга ноқулай эди. Лекин ўшанда ҳам кўп нарсани ўргандим — хусусан, ҳимояга қайтиш ва унга ёрдам беришни. Қайсидир маънода плюс томони бор, лекин барибир бундай вазият ривожланишимга озгина халақит берди.
— Бу ҳам кетиш ҳақидаги қарорингизга таъсир қилдими?
— Сабаблардан бири бўлди. Бундан ташқари, шунчаки кейинги қадамни ташлаш вақти келганини ҳис қилаётгандим.
— Бир йил олдин Владимир Федотов билан ишлаш сизга қандай бўлганди?
— Жуда яхши. У менга эркинлик берарди. Озодлик берилганда эса, ўзимни энг яхши томондан кўрсата оламан.
— У билан алоқани сақлаб турмаяпсизми?
— Йўқ. Мен шунчаки рақамимни Туркия рақамига ўзгартирдим ва шу сабабли кўплаб контактларни йўқотиб қўйдим. Лекин Николич ҳақида ҳам ёмон хотираларим йўқ. Трансферим амалга ошганда, Марко менга қўнғироқ қилиб, табриклади. Ва мен ундан, такрорлайман, кўп нарсаларни, биринчи навбатда ҳимояланиш билан боғлиқ жиҳатларни ўргандим. Бу менга футболчи сифатиda янада яхшиланишимга, ҳар томонлама шаклланишимга ёрдам берди. Ҳозир Шаҳин клубда мени шунинг учун мақтаяпти — ҳимояга ёрдам бераётганим учун.
— Фабио Челестини билан ҳам кўришишга улгурдингизми?
— Ҳа. Адашмасам, у келган пайтда жамоа билан икки ҳафта ишладим. Машғулотлар жуда яхши эди, менга улар ҳам, унинг ғоялари ҳам ёқди. Фабио менинг қолишимни хоҳлашини айтди. Аммо ўша пайтда мен аллақачон кетишга қарор қилиб бўлгандим.
— Туркияга кетаётганингизда, топ-5 чемпионатларидан вариантлар йўқмиди?
— У ерга ҳам кетишим мумкин эди, лекин санкциялар туфайли бу иш амалга ошмади.
— Қайси чемпионат қийинроқ — Россияникими ёки Туркияники?
— Менимча, иккаласи ҳам бир хил даражада қийин. Туркияда ўйнаш Россиядагидан кўра оғирроқ деб айта олмайман.
Каннаваронинг футболчиларга муносабати ва бошқа кўплаб мавзулар. Аббосбек Файзуллаев Россия нашрига катта интервю берди (1-қисм)