Камо Газаров: "Бизни фақат ғалаба қаноатлантиради"

- Эртанги ўйин жуда ҳам қийин бўлади. “Металлург” ўйинни бошқара олиши, жамоавий бир-бирини тушуна олиши жиҳатидан “Пахтакор”, “Насаф” сингари жамоалардан асло қолишмайди.

Рақибларда яхши мураббий, ажойиб ижрочилар бор. Буни уларнинг турнир жадвалидаги ўрни ҳам кўрсатиб турибди. Шу боис биз ушбу ўйинда 90 минут ҳушёрликни қўлдан бой бермаслигимиз, рақибнинг камдан-кам кузатиладиган хатоларидан унумли фойдаланишимиз талаб талаб этилади. Агар ютсак, турнир жадвалида анча юқорилаймиз. Ютқазсак уларни 4 очкога олдинга ўтказамиз. Шунинг учун эртага бизни фақат ғалаба қаноатлантиради.

Ўринбосарлар учрашуви ҳақида нима дейишим мумкин? Ўйин кескин тўқнашувлар остида кечди. Бутун ўйинда ҳужум қилган бўлсак-да, биргина қарши ҳужумдан гол ўтказиб юбордик. Яхши ҳамки болалар бундан тушкунликка тушмай босимни янада оширишди. Бу эса сўнгги сонияларда самарасини бериб, ҳисобни тенглаштирдик.

Ўринбосарлар жамоаси ҳали ёш, таркиб ҳам янги, деярли ҳар бир ўйинда ўзгармоқда.Чунки бизда иқтидорлар кўп. Футбол интернати, туманлардан кўплаб ёшлар келишмоқда. Уларнинг имкониятларини синаяпмиз. Ҳар бирига турли ўйинларда имкон беряпмиз.

Насиб қилса, иккинчи даврада болалар янада бир-бирини тушуниб ўйнашади. Ўшанда ўринбосарлар жамоасида ҳам натижалар кўзга ташланади, - дейди Камо Газаров.

"Бухоро" матбуот хизмати