Жамшид Саидов кубокдаги йирик мағлубиятдан сўнг: "Асосий мақсадимиз чемпионат ўйинларига қаратилган"

Ўйин ҳақида

- Нима ҳам дейишим мумкин? Бугун иккинчи таркибимиз билан ўйнадик. "Андижон" кучли таркиби билан майдонга чиқди ва устунликка эга бўлди. Йигитлар ёмон ўйин кўрсатишмади, ҳаракат қилишди. Кубок ўйинларида асосан ёшлар таркиби билан ҳаракат қилдик. Асосий куч ва эътибор чемпионат ўйинларига қаратилади, чунки Суперлигадаги ҳозирги натижаларимиз бизни қониқтирмаяпти. Диванда ёнбошлаб пост ёзадиган таҳлилчилар иккинчи таркиб билан ўйнашимиз борасида кўп гапиришди. Биз мавжуд имкониятларимиздан келиб чиққан ҳолда ҳаракат қилаяпмиз. Ёш футболчиларда хатолар кузатилади, бу табиий ҳол. Бугун ҳам айрим вазиятларда футболчиларга тажриба етишмади. Умумий айтсам, ёмон ўйнамади йигитлар. Миннатдорчилик билдираман бугунги ўйин учун. 

- Жамоангиз бугун ёшлар таркибига ишонч билдирганига сабаб нима?

- Айтиб ўтдим, биз кубок ўйинларида асосан ёшлар ва ўйин амалиёти кам футболчиларга имконият бердик. Чунки асосий мақсадимиз чемпионат ўйинларига қаратилган. Гуруҳ босқичидан бошлаб биз шу йўналишда ишладик. Суперлига иккинчи давраси янада оғир ва қийин ўтишига шубҳа йўқ.

- Раҳбарият кубок ўйинларида вазифа қўймаганини айтаяпсиз. Мухлислар ҳурмати учун ҳам бугун асосий таркиб майдонга туширилса бўлмасмиди? 

- Такрор айтаман, биз ҳозир мавжуд имкониятдан келиб чиқиб ҳаракат қилдик. Ҳеч қайси мураббий майдонга ютқазиш учун тушмайди. Ёш футболчилар, ўйин амалиёти кам бўлган футболчиларга ўзларини кўрсатиш учун имконият бердик. Ютиб қўйсак, бошқача фикрлар янграши аниқ эди. Йигитлар ҳаракат қилишди, лекин озроқ маҳорат етишмади.