Григорий Колосовский "Динамо"га қарши учрашувдан сўнг раҳбарият томонидан қўйилган вазифа, Ўринбоевнинг ҳолати ва Бекободаги майдон ҳақида кескин фикр билдирди

"Қийин ўйин бўлди. Биринчи бўлимда кичик устунлик самарқандликлар томонида бўлди. Иккинчи бўлимда эса устунликни рақибдан тортиб олдик. Ўзимизнинг вазиятлардан фойдалана олмадик. Гол бўлган вазиятда ҳам биз ҳужумда эдик, бирга бир вазиятдан фойдалана олмадик ва қарши ҳужумда ўзимизнинг хатоимиз сабабли гол ўтказиб юбордик. Хатоларни таҳлил қиламиз", - деди Колосовский

- ФИФА кунлар муносабати билан жамоаларда катта танаффус бўлади. Шу вақт орасида "Металлург"да нималарни ўзгартирса бўлади?

- Ишлаб кўрамиз, жамоамий ўйин устида ишлаймиз. Вазиятларимиз етарли бўлмоқда, бироқ гол ура олмаяпмиз. Асосий муаммо шунда. Шу сабабли ғалабалар йўқ. Гол урмасдан туриб, учрашувда ғалаба қозона олмаймиз.

- Забиҳилло Ўринбоев ўтган мавсум ажойиб ҳаракат қилаётганди, бироқ кейин жароҳат олди. Ҳозирда унинг аҳволи қандай?

- Ҳозирда руҳий томодан қийинчиликларга учрамоқда. У яна жиддий жароҳат олишдан қўрқмоқда. Шу сабабли у ҳали тўлиқ тайёр эмас. У кўп ҳолларда курашлардан қочмоқда. У олдида ҳаракат қилиши керак. Биз уни олдинга ташладик, у тўпга эгалик қилиши, жарималар ишлаши лозим. Бироқ у ортга қайтиб ҳаракат қилмоқда. У ҳали 100 фоизга тайёр эмас. Агар руҳий томондан тўлиқ тайёр бўлса, биз аввалги Забиҳиллони кўрамиз. 

- Жамоага келганизда раҳбарият томонидан сизга қандай вазифа қўйди?

- Кучлилар сафида ўрнимизни сақлаб қолиш. Биз буни уддалашимиз керак. 

- Жамоани Бекободда ўйнамаётгани ҳам "Металлург"нинг натижаларига таъсир кўрсатмоқдами?

- Ҳа бу қаттиқ таъсир кўрсатмоқда. Биз у ерда ҳар куни машғулот олиб борамиз. Бекободдаги стадион анча яхши ҳолатда, фақатгина сув дренажлари йўқ. Умуман олганда майдон анча сифатли. Бекободдаги ўйинларда 4-5 минг мухлислар ташриф буюрарди. Биз Бекободдаги мухлисларни футболсиз қолдирмоқдамиз. Бу ерга 100 га яқин мухлис келмоқда. Бу яхши эмас.

Бекободаги стадионни бориб кўришсин, у ерда яхши майдон бор. Тўғри озгина муаммоалар бор, лекин ҳозирда об-ҳаво яхшилигини ҳисобга олсак, у ерда бемалол футбол ўйнаса бўлади.  Ёшлар жамоаси ўйнамоқдаку. Мантиқан олиб қарасак, бизнинг ҳар бир учрашувимиз сафар баҳси бўлмоқда. Ҳар бир турда сафар қиламиз. Ортда қолган 17-турнинг барчасида меҳмонда ҳаракат қилдик. Бу нима билан боғлиқ, билмайман. Бошқа жамоаларнинг майдонларини қаранг, қандай аҳволда. Ҳаммада бир хил ҳолат, бироқ икки хил стандарт. Бу нима билан боғлиқ? Бу савол жавобини билгим келади. 

Ҳозир дренажни янгилашни бошласа, "Металлург" яна бир йил меҳмонда ҳаракат қилади. Биз Олмалиқда ўз уйимизда ўйнагандек ҳаракат қила олмаймиз. Мухлислар қаршисида майдонга тушиш анча яхши. Олмалиқ нейтрал майдон ҳисобланади. Бу эса рақибларнинг фойдасига ишлайди. Яна бир бор таъкидлайман, Бекободдаги майдон сифати анча яхши. Биз фақатгина мухлисларни футболсиз қолдирдик. Агар Бекободда ўйнагамизда биз ҳозир бу аҳволда бўлмаган бўлардик. Бизга ҳар турда меҳмонда ҳаракат қилиш ёқмаяпти.