Дилшод Ирсалиев: "Жаҳон чемпионатидаги ҳиссиётларни сўз билан таърифлаб бера олмайман"

"Жаҳон чемпионатида қатнашган вақтларимдаги ҳиссиётларни сўз билан таърифлаб бера олмайман. Ўзбек футзали тарихидаги биринчи Жаҳон чемпионатида қатнашиш орқали мухлисларга ажойиб лаҳзаларни ҳадя қилган эдик. Жаҳон чемпионатидаги иштирокимизни кутилмаган мағлубият билан бошладик. 2-турда мусобақа мезбони Колумбияга қарши сўнгги сонияларда ўтказиб юборилган голлар эвазига ғалабани қўлдан чиқарганимиз аламли бўлган. Балки ўша учрашувда ғалаба қозонганимизда гуруҳдан чиққан бўлармидик. Португалияга қарши баҳсда йирик ҳисобда мағлуб бўлганимизга қарамай, ўйинни ёмон ўтказмаган эдик.

Бошланажак мундиалда йигитларга омад тилайман. Ўйлайманки, мухлислар кўмаги остида улар камида гуруҳдан чиқиш вазифасини уддалайди. Шахсан ўзим жамоамиз ярим финалга қадар етиб боришига ишонаман", - деди Ирсалиев.