Денис Коростиченко: "Бошқа баҳсларни умуман кузатмадик"

- Биринчи навбатда мухлисларни ғалаба билан табриклайман. Йигитлар бу ғалабага муносиб эди. Буни узоқ кутган эдик. Аввалги ўйинлар, "Пахтакор" ва "Бунёдкор"га қарши учрашувларда ҳам яхши ҳаракат қилгандик. Бугун рақибдан устунроқ эдик. Улар ҳам ҳаракат қилишди, ҳимоядан ўйнаб, қарши ҳужумларни мақсад қилишганди. Жамоамиз бироз бўшашгандек бўлди, буни кейинроқ кўриб чиқамиз. Мавсум ҳамма учун якунланди, бироқ биз учун эмас. Яна битта ўйин ўтказишимиз керак. Унга тайёрланамиз. Навбатдаги баҳсда чемпионатдаги ўрнимизни сақлаб қолишга уринамиз.

- Параллел ўйинларни кузатиб боришда ҳаяжон босдими?

- Тўғрисини айтсам, бошқа баҳсларни умуман кузатмадик. Чунки бор эътиборни ўз ўйинимизга қаратдик. Учрашувдан кейингина бошқа учрашувлар натижасини кўрмоқчи эдик. Мен ҳам, Мирко ҳам сўраганимиз йўқ. Аммо телефони борлар ҳисобларни айтиб туришди.

- Жорий мавсумда "Локомотив" сафида 7 нафар футболчи чемпионатда дебют ўйинини ўтказди. Кейинги йил ҳам ёшларга эътибор қаратишда давом этасизми?

- Албатта. Академиямиздан ҳам яхши футболчилар етишиб чиқмоқда. Уларни тезда асосий таркибга кирита олмаймиз, чунки рухий ва жисмоний ҳолатни ҳам ҳисобга олиш керак. Бироқ ҳар қандай ҳолатда уларни қўллаб-қувватлаймиз. Айни дамда асосий вазифамиз Суперлигада қолиш. Агар жамоамиз лигада қолса асосий таркибдан кўпроқ ёшлар жой олиш мумкин.