"Биз ҳеч қачон дуранг натижадан қониқмаймиз"

"Хоразм"нинг сўнгги ўйинидан келиб чиқиб, бугунги учрашувга тайёргарлик кўргандик. Майдон ҳолати туфайли комбинацион футбол намойиш этиш қийин эканлигини билардик. Шу сабабли яккакурашларда ғолиб чиқиш асосий ролни ўйнар эди. Яккакурашларда кўпроқ ғолиб бўлган жамоа, якунда ғалаба қозонар эди. Бугун жанговар ўйин бўлди, ҳисоб ҳам ўйинга мос бўлди. Биз ғалабани илиб кетишимиз мумкин эди, "Хоразм" ҳам ғалабага қозониш учун етарлича ўйин намойиш этди деб ўйлайман. Икки жамоа ҳам енгилишни истамади. Тўғри, хато ва камчиликлар ҳам бўлди. Уларни кейинроқ ўрганиб чиқамиз. Кейинги учрашувларга тайёргарлик кўришимиз керак", - дея фикр билдирди Баҳром Ҳайдаров бугунги учрашув ҳақида. 

- "Хоразм" футболчиси Фарруҳ Иброҳимов майдондан четлатилганидан кейин ҳам жамоангиз ҳужумкор ўйин услубига ўтмади. Жамоангиз бугун дуранг натижасига ҳам рози эдими?

- Биз ҳеч қачон дуранг натижадан қониқмаймиз. Биз ўйин давомида учта ҳужумчи билан ўйнадик. Майдон марказини кучайтиришга ҳаракат қилдик ва шу сабабли бир ҳимоячимизни захирага олдик. Сон жиҳатдан кам бўлиб қолган жамоа, ҳимояга кўпроқ эътибор бериши аниқ. Бу бизга қийинчилик туғдирди. Сўнгги 25 дақиқада рақиб зич ҳимоялангани туфайли яхши комбинациялар амалга ошира олмадик. "Хоразм" зич ва яхши ҳимояланди. Тўғри, стандарт вазиятлардан гол уришимиз мумкин эди, аммо буни уддалай олмадик. "Хоразм" бир киши кам бўлиб ҳам бир нечта хавфли вазиятга эга бўлди. Шу сабабли бугунги дуранг адолатли натижа бўлди деб ўйлайман.

- "Қўқон-1912" жамоаси яхши ўйин намойиш этмоқда, аммо жамоангизга барқарорлик етишмаяпти. Бунга сабаб нима?

- Эътибор берган бўлсангиз, иккинчи даврадаги "Бухоро"га мағлуб бўлган ўйинимиздан ташқари қолган барча баҳсларда биз устунлик қиляпмиз, аммо эътиборсизлик туфайли кўп гол ўтказиб юборяпмиз. Кам гол урмоқдамиз, бу ҳам муаммо. Кўпроқ эътиборли бўлишимиз керак. Юқори даражали футболчилар етишмаяпти. Уч-тўртта баҳслардаги дурангларни ғалабага айлантира олганимизда, мусобақа жадвалида янада баландроқда бўлардик. Бугунги учрашувни бевосита кузатиш учун ташриф буюрган ва бизни қўллаб-қувватлаб турган мухлисларимизга ўз миннатдорчилигимни билдираман.