"Барселона" де Йонгга узоқ муддатли шартнома таклиф қилади

"Барселона" Френки де Йонг учун янги беш йиллик шартнома тайёрламоқда, деб хабар берди "Mundo Deportivo". Нидерландиялик ярим ҳимоячига Марк-Андре тер Штеген билан бир хил формула таклиф қилинади. Яъни, Каталония клуби молиявий чекловларга тўғри келиши учун Френки шартноманинг дастлабки икки мавсумида маошини камайтиришга рози бўлиши керак. Ва кейинги уч йил ичида у ўзига тегишли бўлган ҳамма нарсани олади.

Френки де Йонгнинг амалдаги шартномаси 2026 йилнинг ёзида тугайди, шунинг учун "Барселона" шошмайди. Бироқ спорт директори Деку олдига футболчининг агенти билан муносабатларни яхшилаш вазифаси қўйилган. Агент билан алоқалар "Барселона" нидерландиялик ўйинчини сотмоқчи бўлганида ёмонлашганди.

Френки де Йонг каталонияликлар сафида 2019 йилнинг ёзидан буён ўйнамоқда. У "Барселона" сафида 187 та ўйинда майдонга тушиб, 16 та гол урган ва 21 та голга ассистентлик қилган.