Баҳром Ҳайдаров: “Фарғона футболи шарафини муносиб ҳимоя қилиш устивор вазифамиз”

Спортнинг турли йўналишларида ўз имкониятларини ишга солаётган ёш спортчилар орасида Фарғона терма жамоаси вакиллари ҳам қизғин рақобат олиб боришмоқда. Қувонарли тарафи, спортнинг футбол тури бўйича саралашда иштирок этаётган Фарғона жамоаси Қаршида бўлиб ўтган босқичда муваффақиятли иштирок этиб Жиззах шаҳрида бўлиб ўтадиган финал босқичига йўл олди. Мусобақада фарғоналик ёш футболчиларга бошчилик қилган тажрибали мутахассис, бугунги кунда “Нефтчи” ёшлар жамоасида бош мураббий сифатида фаолият кўрсатаётган Баҳром Ҳайдаров “Нефтчи” футбол клубининг матбуот хизмати вакилларига турнир борасидаги ўз фикрларини тақдим этди.

– “Биринчи ўринда Фарғона терма жамоаси билан “Баркамол Авлод-2017” турнирининг финал босқичига йўл олганимиздан хурсандмиз. Умуман олганда Жиззахдаги  босқичга йўлланма олиш вазифаси осон кечмади. Турнирдан аввал вилоят раҳбарлари томонидан бизга мусобақанинг финал босқичига чиқиш вазифаси юклатилган эди, – деб гап бошлади Ҳайдаров

ТУРНИР ҲАҚИДА

Мусобақада мамлакимизнинг 14 та жамоаси иштирок этди. Республика миққиёсида бўлиб ўтадиган мана шундай турнирларга иштирокчилар турли-хил мақсад ва вазифалар билан ташриф буюришади. Бироқ бу сафар Қаршидаги ўйинларда деярли барча терма жамоалар финал ўйинлари бўлиб ўтадиган босқичга йўлланма олиш учун кураш олиб боришди. Бу эса ўз-ўзидан юқори рақобатни юзага келтирди. Ўйинларни кўзатиб шундай хулосага келдимки, турнирга келган барча жамоалар унга жиддий муносабатда ёндошгандилар. Чунки хар бир терма жамоага барча ўйинларни ғалаба билан якунлаб финал чиптасига эгалик қилиш вазифаси топширилганди.  Шунингдек бизга ҳам. Турнир борасида яна фикр билдирадиган бўлсам, ушбу мусобақа селекционерлар учун катта футбол бозорига айланди. Чунки у ерда  18-19 ёшдаги юқори истеъдодли футболчилар кўплаб топиларди. Биз ҳам имкон қадар турнирдаги бошқа ўйинларни кузатиб бориб, бир қатор иқтидорларни кўз остимизга олиб қўйдик. Шу қатори Олий лига клубларининг селекционер мутахассилари турнирни диққат билан кузатиб боришди. Мамлакатимизнинг турли нуқталаридан келган жамоалар таркибида юқори маҳоратли ўйинчилар талайгина бўлди. Ўзбекистон Олий лигаси, Ёшлар лигаси ва Биринчи лига баҳсларида мунтазам ўйнаб келаётган ёш шу билан биргаликда ўзига яраша тажрибага эга футболчилар ўртасидиги рақобат ҳам қизғин тус олди. Ҳакамлик борасида ҳам ижобий фикрларни айтишим мумкин. Ўйинларда ҳакамлар жуда холисона ишлашди. Ҳакамлик меъёри нормал бўлган ҳолда футбол биринчи ўринга чиқади. Тенг ва ҳалол кураш кечган беллашувда ҳақиқий ўйин бўлади.

ГУРУҲ ЎЙИНЛАРИ ҲАҚИДА

Мусобақада Фарғона терма жамоаси “D” гуруҳидан ўрин эгаллади. Гуруҳда бизга Тошкент, Сурхондарё ва Навоий термалари рақиблик қилди. Гарчи гуруҳнинг барча ўйинларида ғалаба қозонган бўлсакда гуруҳ беллашувлари жуда оғир ва машаққатли кечди. Чунки мусобақа регламентига кўра, гуруҳдаги 3 та ўйинимизни хар куни ўтказдик, яъни бир кун ҳам дам олишсиз гуруҳ учрашувларида иштирок этдик. Яна бир қийинчилик тарафи, турнир қайдномасига умумий 14 нафар футболчини киритиш буйича ҳам регламент банди мавжуд эди. Заҳиранинг қисқа эканлиги барибир ўз таъсирини ўтказди. Бироқ шунга қарамасдан ҳам йигитларнинг тайёргарлиги яхши эканлиги ва ўйинга, муваффақиятга бўлган муносабати ҳамда интилиши хар баҳсда уларга қўшимча далда бўлди. Шунингдек ёшлар билан ишлаш борасида яхшигина тажрибага эга Хушбек Қосимов ва делегация раҳбари Тоҳир ака Кападзелар турнир давомида хар тарафлама ёрдам бериб боришди. Якунда эса ҳақли равишда биринчи ўрин билан гуруҳдан чиқдик. Гуруҳдан чиққанимиздан сўнг Андижон термасига рўбаро келдик. Бу ўйин эса ҳал қилувчи аҳамият касб этарди. Андижонликлар қарши ўйин ҳам осон бўлмади. Шукурки, беллашув бизнинг фойдамизга ҳал бўлди. Термамиз таркибида “Нефтчи”дан 9 нафар, “Ёзёвон-Лочинлари” ва “Цементчи” клублари бир қатор маҳоратли ёшлар жамоамиз шарафини ҳимоя қилишди. Энди бизни Жиззахда ҳал қилувчи синовлар кутмоқда. Сўнгги босқичда ҳам муваффиятли иштирок этиб бош мақсадимизга эришишга жиддий бел боғлаганмиз. Бу борада ўз шогирдларимга ишонаман. Яна шуни таъкидлашни истардимки, Фарғона футболи шарафини муносиб ҳимоя қилиш устивор вазифамиз ҳисобланади, – деди Баҳром Ҳайдаров