Баҳодир Аҳмедов: "Сен урмасанг, сенга уришади"

Ўйин ҳақида

- Биринчи навбатда Камбоджа терма жамоасига миннатдорчилик билдирган бўлардим. Улар бугун бизга жуда яхши қаршилик кўрсатишди. Дастлабки бўлимда жуда кўплаб имкониятлардан фойдалана олмадик. Бу ўринда "Сен урмасанг, сенга уришади" нақли ишлади, биринчи бўлиб ҳисобни Камбоджа вакиллари очиб кетишди. Биз ўз хатоларимиз эвазига жазоландик. 

Иккинчи бўлимда йигитларга аниқ мақсад ва талаб қўйдик. Ўйинимиз ўзгарди, жамоамиз вакиллари ишончли ўйин намойиш эта бошлашди ва якунда йирик ғалабага эришдик.

- Жамоа мураббийлар штабига келиб қўшилган хорижлик мутахассиснинг фойдаси қай даражада тегаяпти?

- У киши менинг устозимнинг ҳам устози ҳисобланади. Бизга ўзининг муҳим ва қимматли кўрсатмалари билан ёрдам бераяпти.

- Бугунги ўйинда кўплаб ротацияларга қўл урдингиз. Бу жараён давом этадими?

- Албатта, биз ротациялар бўйича мунтазам ишлаймиз. Бу биз учун фойдадан холи бўлмайди.

- Жамоа таркибида айрим футболчилар кўринмади. Масалан, Анасхон Раҳматовни қайдномада ҳам кўрмадик...

- Анасхонда жароҳат бор. У тиббий муолажаларни олмоқда. Тез орада сафимизга қайтишига умид қилаяпмиз. 

- Жамоанинг собиқ аъзоси Рустам Умаров мураббийлар штабида қандай вазифани бажармоқда?

- Рустам Умаров жамоамизда дарвозабонлар мураббийи вазифасини бажармоқда. Унинг тажрибаси бизга асқотишига ишонаман.