АПЛ тарихидаги энг қиммат футболчи Энцо: "Челси" мухлислари қаршисида ўйнашни сабрсизлик билан кутяпман"

Аргентина терма жамоаси билан жаҳон чемпионлиги қўлга киритган хавбек АПЛ тарихидаги энг қиммат харид бўлди. 22 ёшли ярим ҳимоячининг трансфер қиймати 121 миллион еврони ташкил қилди.

"Мен "Челси" ва унинг эгаларига мени ушбу лойиҳанинг бир қисми бўлишим учун қўлидан келганини қилгани учун миннатдорман. Мен бу жамоага қўшилганимдан, дунёнинг энг яхши лигасида ўйнашим, энг муҳим совринлар учун курашишимдан хурсандман ва ҳаяжондаман.

Мухлисларимиз қаршисида ўйнашни ва жамоадошларимга майдонда ва ундан ташқарисида ёрдам беришни сабрсизлик билан кутяпман", – деди Фернандес "Челси" матбуот хизматига.

Маълумот ўрнида, кеча "Челси" "Кобхэм" (клуб машғулот базаси – таҳр.)да Энцо Фернандеснинг тақдимот маросимини ўтказди. Аргентиналик хавбек 5-рақамни олди. Бунгача мазкур рақам остида куни кеча "Арсенал"га ўтган Жоржиньо ўйнарди.