АПЛ клублари Навас билан шартнома имзоламоқчи

Англия клублари ПСЖ дарвозабонини сотиб олиш ҳақида ўйламоқда. Клуб билан шартномасининг тугашига бир ярим йил қолганига қарамай, 36 ёшли посбон жорий мавсум парижликлар сафида атиги бир марта Франция Кубоги доирасидаги учрашувда майдонга туширилди. "Реал"нинг собиқ дарвозабони "қироллик клуби" билан 3 марта Чемпионлар Лигасида зафар қучган бўлса-да, ПСЖда италиялик Жанлуижи Доннаруммадан кейин иккинчи рақамли дарвозабон бўлиб қолмоқда.

Англия чемпионати клублари тажрибали футболчига қизиқиш билдираётгани маълум бўлишидан аввал Навасга собиқ жамоадоши Криштиану Роналду яқинда бориб қўшилган "Ал Насср" расман таклиф билан чиқди. Наваснинг 12 млн евролик йиллик маоши Саудия Арабистони клубини чўчитгани йўқ, бироқ улар рақобат анчагина кучли бўлган лига вакилларидан тушаётган таклиф олдида қийинчиликка дуч келиши мумкин. 

"Ноттингем Форест" дарвозабони Дин Ҳендерсон ушбу мавсум кўплаб ажойиб индивидуал маҳоратини намойиш этди. Бироқ у "Манчестер Юнайтед"дан ижарага олинган. Агар "қизил иблислар" билан мавсум сўнгида қўшимча ижара битими келишиб олинмаса, "Форест" ўзининг юлдуз "қўриқчиси"сиз қолиши мумкин. Наваснинг олиб келиниши унинг учун муносиб ўзгариш бўлиши тайин. "Борнмут" ушбу мавсум деярли бир хил даражадаги икки дарвозабонни иш билан таъминлади. Бироқ жамоа сўнгги 10 ўйинда бор-йўғи 4 очко жамғарди. Ушбу ёмон серияда "Борнмут" дарвозабонлари 21 та тўп ўтказиб юборди.