Андрей Шипилов: "Қўқон-1912" энг ёши катта жамоа? Гапингиз тўғридир. Лекин мен паспортга қарамайман"

- Илк навбатда шундай ажойиб сифатдаги майдон учун катта раҳмат айтаман. Бу одамни хурсанд қилди. Бундай майдонда хато қилиш мумкин эмасди. Ўзбекистон учун уч даража совуқ ҳаво одамга минус 10, 15 даража каби сезилса-да, Қўқондан бизни қўллаб-қувватлаш учун келган, шунингдек, "Локомотив"нинг мухлисларига ҳам раҳмат айтаман. Ундан ташқари, ҳозир Рамазон ойида бўла туриб, совуқ ҳавода стадионга келиб, кўп бўлмаса-да, жамоаларини қўллаб турган мухлислар учун ёмон гаплар айта олмайман. Сизларнинг қўллаб-қувватлашингизни иккала жамоа аъзолари ҳам ҳис қилиб туришди. Бугунги ўйин жуда жуда ва жуда қизиқарли бўлди. Икки хил тактик қарашларга эга мураббийларнинг ўйини ўтказилди. Ўйиндаги темп, курашларни инобатга олсак, бу баҳс кечаги "Пахтакор" - "Навбаҳор" учрашувидан кам бўлгани йўқ. Бу менинг фикрим, албатта. Кеча бу ўйинни кўргани бора олганим йўқ, жамоа билан бошқа ишларни бажардик. Лекин ўйинни томоша қилдим. "Локомотив" ҳам, бизнинг жамоа ҳам бугун ўзидан яхши таассурот қолдирди. Стандартларда, ҳимояда, ҳужумда ўйланган комбинациялар, схемаларни кўрдик. Ўйин голгача давом этиши керак эди. Бугун бизда ғалабага етиштира олмаган биргина омил бўлди - яхши кучли ҳужумчи. Тома Табатадзе бироз жароҳат олганди. Бизда эса унинг жойини кучайтиришга ресурслар етишмади. "Локомотив" эса доимгидек "Локомотив". Уларнинг ўз услуби, ўз йўналиши бор. Жамоанинг "дайди ўғиллари" яна қайтишди. Уларнинг ушбу жамоа таркибида бирга кўриш менга ҳам ёқимли бўлди. Ўз жамоамга ҳеч қандай эътирозим йўқ. Ҳакамлик ҳам бугун европача бўлди. Ортиқча ҳиссиётлар, ҳаракатларсиз футбол кўрдик. Деярли барча футболчилар тўлиқ ўйинни босим остида ўтказишди.

- "Қўқон-1912" дастлабки ўйинларда гол уришга қийналмоқда. Ягона гол ҳам пенальтидан урилди. Ҳужумчилар унчалик ёмон эмас. Бу ҳолатга қандай қарайсиз?

- Биринчи турдан бери менга шундай савол берилмоқда. Илк марта бу саволга жавоб берганимда, асосан, олди чизиқдаги футболчиларга тўхталгандим. Ўшанда мен йигитларга шунчаки гол уриш кераклигини, бизда вазиятлар жуда кўп бўлганини айтгандим. Энди бу ҳақида яна гапиришни истамайман. Бу ҳали ҳам менинг миямда турибди ва унутишнинг иложи бўлмаяпти. "Пахтакор" билан ўйинда бизда кам вазият бўлди. Лекин 10 киши бўлиб, гол ура олгандик. Бугун ҳам бир қанча яхши вазиятларимиз бўлди. Айтганимдек, бугун бизга Тома етишмади. Шундай катта салоҳиятга эга ҳужумчи, ҳеч бўлмаганда иккинчи бўлимдаги 30 дақиқа учун ҳам керак бўларди. Ўшанда ўйин янада қизиқроқ бўлиши мумкин эди. Нимели, Ҳусанов жуда яхши ишларни бажаришди. Бироқ улар енгил бўлган ҳужумчилар. Улардан кейин эса кучлироқ ҳужумчиларни ўйинга ташлаш керак. Биз ҳаракат қилишда давом этамиз, бизда вазиятлар етарлича. Ортга, ҳимояга ётиб олмаймиз. Деярли барча ўйинларда ҳужумда ўйнашга ҳаракат қиламиз. Бизга айрим вазиятларда, шунчаки, совуққонлик ҳам етишмаяпти. Кеча "Нефтчи"нинг ўйинини томоша қилдим, уларда ҳам голларни ҳужумчилар уришмади. Биз деярли барча машғулотларда бу борада ишлаймиз, бунинг учун жамоада етарлича футболчилар ҳам бор. Ҳали ҳужумчиларимиз ўзларини намоён қилишади.

- Жамоа 3-турни якунлади. Умуман олганда Сиз дастлабки уч ўйиндан неча очко олишни режалаштиргандингиз?

- 4 очко. Лекин биргина очко ишладик. Ҳозир бунинг ньюанслари ва сабабларини тушунтириб бера олмайман. 2-турда "Пахтакор" билан ўйнадик ва бу жамоа ўйинчоқ эмас. "Пахтакор" - жиддий жамоа. 1-турда "Бухоро"га бордик, у ерда бошқача футбол, мураббийининг ўзгача йўналиши бор. Қизиғи, мана шу учала ўйинда ҳам бизга қарши яхши тайёрланишибди. Чунки бу барча ўйинлар тактик ўйинлар бўлди. Қаердадир бизга қаттиқ босим беришгани ёки жуда ҳимояга ўтқазиб қўя олишганини эслай олмайман. Бизга қарши рақиблар тактика томонлама жуда яхши ўйнашмоқда. 3-турга келиб илк дурангни биз қайд этдикми? Бу турга қадар бирорта дуранг бўлмаганди. Аҳамият берган бўлсангиз, бугун биз ҳимояга ётиб олмадик. Ўйинни ҳужумда тугатдик десак ҳам бўлади. Баъзида буюк жамоалар ҳам ҳужумда ўйнаб, 0:0 ҳисобини қайд этади. Бўлиб туради.

- Бугун жамоангиз рақибдан кучлироқ кўринди. Вазиятларни инобатга олсак, бугун "Қўқон-1912" икки очко йўқотди дейишимиз ҳам мумкин.

- Фикрингизга қўшиламан. Ўйиннинг бошиданоқ жамоани ҳужумга чорладим. Бугун биз ғалабага лойиқ эдик, деб ҳисоблайман. Тактик томонлама жуда мураккаб ўйин бўлди ва бу биринчи голгача давом этиши керак эди. "Қўқон-1912" бугун ғалабага лойиқ ўйин намойиш қилди. Шу билан бирга "Локо" ҳақида ҳам ёмон гап айта олмайман. Чунки улар ҳам бугун уч очкони олиб кетиши мумкин эди. Иккала томон ҳам бугун натижадан мамнун эмас.

- Дастлабки турларда ўртача энг ёши катта жамоа сифатида "Қўқон-1912"ни топишмоқ жамоа десак бўладими? Чунки Сиз узоқ муддат давомида чемпионатимизда ишламадингиз. "Қўқон-1912" ёмон ўйнаётгани йўқ.

- Мен қабул қилиб олганимда, жамоанинг 75 фоиз таркиби тузиб бўлинганди. Жамоага олинган барчадан мамнунман. Нимели, Соҳибжонов, Сидиқовни қайтардик, Гулямов, Гадоевни олиб келдик. Аввало бюджетга қараш керак. Клубда нималар бўлса, жамоада ҳам шулар бор. Шунга қараб мақсад-вазифаларни қўйиб бориш керак. Катта бонуслар эвазига футболчиларни таркибга жалб қилиш мумкин. Лекин кейинчалик бу кема бирор кун тешилиши мумкин. Биз бюджетга қараб олиб келинган футболчиларга реал қараймиз. Менга барчанинг ўйини маъқул келмоқда. Мен паспортга қарамайман. Аҳамият берган бўлсангиз, бугун ротация амалга ошириб, 5 кишини алмаштирдик. Футболчи яхши ўйин намойиш қилаётган бўлса, нега уларнинг паспортига қараш керак. Ҳозир ёш футболчиларга ҳам катта эътибор бериш, уларнинг иқтидорини тўғри баҳолаш керак. Буни ҳам кўриб чиқиш, муҳокамаларга олиш керак. "Қўқон-1912"нинг ёшлар жамоасидан асосий жамоасига футболчилар ҳам олишимиз мумкин эди. Бироқ ҳозирча бунинг иложи йўқ. Ҳозир улар жамоага мослашиб кета олишмайди. Гапингиз тўғри, жамоанинг ёши каттароқ. Аммо бу сўз менга унчалик ёқмайди. Бирор жамоани мисол қилиб келтиришни истамаган бўлардим. Ёшларнинг ҳам, ёши катталарнинг ҳам ўзига ҳос плюс ва минуслари бор. Мен узоқ йиллар давомида болалар футболида ишлаганман ва буни қандайлигини яхши биламан. Шу сабабли барчасини натижа ҳал қилиб беради. Бугун Ғулом-Ҳайдар Гулямов таянч ҳудудида ўйнади. Унга қандай эътирозлар бор? Ҳеч қандай. Шунчаки респект ва перфект. Унга бирор танқид айтиб бўлмайди. Андронинг ҳам ёши катта. Лекин у катта вазифани бажарди. Тўғриси, бугун ўзлари сўрамагунча асосий таркибни алмаштирмоқчи эмасдим. Чунки жамоа жуда яхши ўйин намойиш қилди. Иккала жамоа футболчилари ҳам ётиб олиб, вақт чўзмади. Бу учун миннатдорман.