Али Ҳасанзода: "Бизнинг мақсадимиз ярим финал. Осиё минтақаси вакиллари чорак финалга қадар етиб боришларига умид қиламан"

- Бугунги баҳс ҳақидаги фикрларингиз?

- Жуда яхши ўйин ўтказдик, аммо биринчи бўлимда Гватемала бизни ҳайрон қолдира олди ва 3та гол урди. Танаффусдан сўнг ўзимизга келиб олдик ва ғалаба қозондик. Иккинчи бўлим Эроннинг кучини намойиш этиб берди.

- Эрон муддатдан аввал плей-офф йўлланмасини ҳал этди. Францияга қарши кечадиган учинчи тур учрашуви жамоа учун шунчаки расмиятчилик бўлиб қолмайдими?

- Йўқ, албатта. Биз гуруҳда биринчи ўринни қўлга киритмоқчимиз. Шунингдек, биз ўйиндан-ўйинга ўсиб боришни мақсад қилганмиз.

- Эрон терма жамоасининг Жаҳон чемпионатидаги мақсадлари қандай?

- Эрон сўнгги мундиалларда яхши иштирок этмоқда. Биз ушбу анъанани давом эттиришни мақсад қилганмиз. Бизнинг мақсадимиз ярим финал босқичи.

- Жаҳон чемпионатида иштирок этаётган Осиё мамлакатлари ҳақида ҳам фикр билдириб ўтсангиз?

- Афғонистон ва Ўзбекистон жуда яхши ўйин намойиш этмоқда. Таиланд ҳам кейинги босқичга чиқишга улгурди. Умид қиламанки, чорак финалга қадар етиб борадиган Осиёлик жамоалар сони кўп бўлади.

- Ҳозирги кунда кўпчилик Эрон терма жамоасини ва шахсан мураббийни танқид қилишмоқда, аммо натижалар яхши. Бундай танқидларнинг сабаби нимада деб ўйлайсиз?

- Биз намойиш этаётган ўйинимиз билан Эрон футзалининг даражасини намойиш этмоқдамиз.

Абдулвосит Бектемиров суҳбатлашди