Александр Волков: "Эртанги ўйинга режамиз бор"

“Мен бунчалик кўп журналистлар қаршисида илк маротаба матбуот анжуманида иштирок этишим. Демак, бизга нисбатан бефарқ бўлмаганлар сони кўп. Ўйинга келадиган бўлсак, “Ал Ҳилол” кучли жамоа. Уларни қандай кучга эга эканликларини Тошкентдаги баҳсда ҳам кўрдик. Шакилланган жамоа. Жамоа мураббийи ҳам ҳурматга лойиқ жуда машҳур инсон. Рақибнинг икки нафар аъзоси эртанги ўйин олдидан сафни тўлдиради. Бизга янада қийин бўлади. Лекин “Бунёдкор”нинг ҳам тайёрлаб қўйган режалари бор. Ўйлайманки мухлисларимизни хурсанд этамиз.

- 2010 йили “Ал Ҳилол” Сколари бошчилигидаги “Бунёдкор”ни 3:0 ҳисобида енган эди. Ҳозир вақт ўтди, таркиб ўзгарди. Ўша ўйин билан эртангисини ўртасида катта фарқ бўлади деб ўйлайсизми?
- Ҳар бир мураббийнинг ўз қараши, режалари бўлади. Сколарининг йўналиши фақат ўзигагина маълум, меники умуман бошқача. Шу боисдан ҳам ҳеч кимни камситмаган ҳолда эски натижаларни эслашни хоҳламасдим.

- Биринчи ўйинни 1:0 ҳисобида ютқазиб қўйдингиз. Жамоангиз жавоб баҳсида гол уриши керак. Ўйинингизни қандай тузмоқчисиз?
- Рақибдан ҳеч қандай қўрқув йўқ. Эртага қандай уйнамоқчи бўлган сирларимизни ҳозир айта олмайман. Аммо бизга натижа келтирувчи режани ишлаб чиққанмиз.

Матбуот анжумани "Бунёдкор" матбуот хизмати ёрдамида тайёрланди.