Абрамов, Алибоев, Неъматов ва Сергеев — Суперлигада 1-давранинг энг яхшилари

Айни пайтда жамоалар танаффусга йўл олишган. Ёзги трансфер ойнаси эса давом этмоқда. 

Championat.asia сайти ўз анъанасига мувофиқ биринчи давранинг энг яхшиларини тузиб чиқди.

Championat.asia сайти талқинига кўра 1-давранинг энг яхши дарвозабони – Абдувоҳид Неъматов ("Насаф").

Ўтган мавсум Суперлигада энг зўр ўйинчилардан бири бўлган ва "Насаф"нинг чемпионлигига катта ҳисса қўшган Абдувоҳид Неъматов 1-даврада ишончли ҳаракатлари билан жамоаси қўрғонини хавфдан сақлаб турди. Шундай қилиб, Абдувоҳид Неъматов Championat.asia талқинида 1-давранинг энг яхши дарвозабони дея эътироф этилди.

Неъматовнинг 1-даврадаги статистикаси: 14 ўйин, 6 қуруқ ўйин, 33 та сейв ("Sofascore" порталига кўра), 11 та гол ўтказган.

Championat.asia сайти талқинига кўра 1-давранинг энг яхши мураббийи – Вадим Абрамов ("Динамо").

Суперлиганинг гранд клубларига таққослаганда анчайин камтар таркибга эга бўлган "Динамо" Абрамов бошчилигида биринчи давранинг ёрқин жамоаларидан бири бўлди. Ўйин томонлама ҳам самарқандликлар мухлислар меҳрини қозонишди. "Динамо" 15 ўйинда 8 ғалаба, 5 дуранг ва 2 мағлубият қайд этди ва биринчи даврани 3-ўринда якунлади. Шундай қилиб, Вадим Абрамов Championat.asia талқинида 1-давранинг энг яхши мураббийи дея эътироф этилди.

Championat.asia сайти талқинига кўра 1-давранинг энг чиройли голи муаллифи – Икром Алибоев ("Нефтчи").

Суперлиганинг 14-турида "Қизилқум" жамоаси ўз майдонида "Нефтчи"ни қабул қилди. Учрашувнинг 68-дақиқасида фарғоналиклар ярим ҳимоячиси Икром Алибоев чамаси 28-30 метрлардан рақиб дарвозасининг тўққизлигини нишонга олди ва ҳисобни очди. Ана шу шедевр Championat.asia талқинига кўра 1-давранинг энг чиройли голи дея эътироф этилди.

Championat.asia сайти талқинига кўра 1-давранинг энг яхши футболчиси – Игорь Сергеев ("Пахтакор").

ОК-2024 да олган жиддий жароҳатидан кейин узоқ вақт футбол ўйнай олмаган Игорь Сергеев мавсум стартидан олдин "Пахтакор"га қайтди. Қайтганда ҳам энг яхши формасига кириб олди. Игорь биринчи даврада 11 та гол урди ва битта ассист берди. Айни пайтда тўпурарлар пойгасида якка пешқадам бўлиб турибди. Шундай қилиб, Игорь Сергеев Championat.asia талқинида 1-давранинг энг яхши футболчиси дея эътироф этилди.

Ресан, Ратиньо, Цигер... Суперлиганинг 1-давра легионерлар рамзий терма жамоаси