Жамоа ҳимоячиси Аббос Отахонов машғулот жараёнлари ҳамда янги мавсум олдидан қўйилаётган мақсадлар ҳақида фикр билдирди.
— Тайёргарлик жараёнлари қандай кетмоқда?
— 4 январь санасида йиғинни бошладик. Кун давомида икки маҳал машғулот ўтказяпмиз. Мавсумга тайёргарликни яхши бошлаб олдик. Таркибимиз ҳам янада тўлиқлашади. Ҳозирча асосий эътибор жисмоний ҳолатни тиклашга қаратилган.
— Ўтган мавсум билан солиштирганда, бу йилдан кутилмаларингиз қандай? Жаҳон чемпионати сабаб тақвим ҳам ўзгариши мумкин…
— Мураббийлар бу омилни ҳисобга олган ҳолда тайёргарлик кўришмоқда. Ўтган йилги натижадан яхшироқ кўрсаткичларга эришишга ҳаракат қиламиз.
— Раҳбарият ва мураббийлар жамоа олдига қандай мақсад қўйган?
— Йиғинни эндигина бошладик, бу борада ҳали катта йиғилиш бўлгани йўқ. Аммо жамоа олдига юқори мақсадлар қўйилмоқда. Иложи борича юқори ўринлар учун курашамиз.
