23 ёшли дарвозабон, ОКМКни ютган мураббий ва футболчи, "Бунёдкор"га супергол урган ҳимоячи — Суперлигада 27-турнинг энг яхшилари

Championat.asia сайти талқинига кўра, 27-турнинг энг яхши дарвозабони – Шоҳруҳ Исоқов ("Сўғдиёна")

"Сўғдиёна" ушбу тур ўз майдонида "Қизилқум"ни қабул қилди ва 3:0 ҳисобида ғалаба қозонди. Мазкур ғалабада жиззахликлар дарвозабони Шоҳруҳ Исоқовнинг ҳиссаси беқиёс. 23 ёшли дарвозабон учрашув мобайнида 4 та сэйв кўрсатди, шулардан 2 таси жарима майдони ичидан йўлланган зарбалар эди. Championat.asia сайти ходимлари муҳокамадан сўнг марказий учрашувда ўзининг ижобий хислатларини намоён этган Исоқовни турнинг энг яхши дарвозабонлигига лойиқ кўрди.

Championat.asia сайти талқинида 27-турнинг энг яхши мураббийи – Асрор Алиқулов ("Шўртан")

"Шўртан" якунланган турда ўз уйида Миржалол Қосимов қўл остидаги ОКМКни меҳмон қилиб, 4:3 ҳисобида доғда қолдирди. Учрашув шу ҳисобда якун топишида ғузорликлар мураббийнинг учрашув учун ишлаб чиққан режаси иш берганидан далолатдир. Мусобақа жадвалида сўнгги поғонада бораётган "Шўртан" совринли ўринлар учун курашётган ОКМКни таслим қила олди. Шу тариқа, ўз уйида ғалабани тантана қилган "Шўртан" устози Асрор Алиқулов турнинг энг яхши мураббийи деб топилди. 

Championat.asia сайти талқинига кўра, 27-турнинг энг яхши футболчиси – Пўлатхўжа Холдорхонов ("Шўртан")

"Шўртан" ОКМКни мағлуб этишида жамоа ҳужумчиси Пўлатхўжа Холдорхонов катта саҳнага чиқди. 22 ёшли футболчи ушбу баҳсда дубль қайд этди. Айниқса, унинг биринчи голи катта меҳнат эвазиг урилди. Шундай қилиб, Пўлатхўжа Холдорхонов Championat.asia ижодий гуруҳи томонидан тур футболчиси дея эътироф этилди.

Championat.asia сайти талқинида 27-турнинг энг чиройли голи муаллифи – Ҳожиакбар Алижонов ("Пахтакор")

"Пахткор" бу тур Тошкент дербисида "Бунёдкор" жамоасини 4:2 ҳисобида мағлубиятга учратди. Учрашувнинг 12-дақиқасида "шерлар" ҳимоячиси Ҳожиакбар Алижонов "Бунёдкор" дарвозасига супергол урди. У ўнг оёғининг ташқи томони билан Валижон Раҳимов қўриқлаётган дарвозанинг юқори бурчагини аниқ нишонга олди. Ушбу гол муаллифи Алижонов тур голи муаллифи сифатида эътроф қилинди.