Вадим Абрамов: "Бухоро" жамоасида ғалабага иштиёқ кўпроқ кўринди"

- Ўйин ҳақида фикрингиз?
- Рақибни ғалаба билан табриклайман. "Бухоро" жамоасида ғалабага иштиёқ кўпроқ кўринди. Бизга шу нарса етишмади. Биз эрта қўл кўтардик, бу эса мағлубиятга олиб келди.

- "Насаф" билан ўйиндан сўнг Рўзиқул Бердиевга "Динамо" ҳақида савол берганимда, "Динамо" асосан 70 дақиқа футбол ўйнаяпти деган жавобни олгандим. Ўшанда "Насаф" ўйин охирида гол уриб бир очкони қўлга киритди. Бу ҳақда ўзингиз нима дея оласиз? Иккинчи саволим, Жаҳонгир Ўрозов терма жамоага номзод футболчи ҳисобланади, лекин бугун умуман ўз ўйинини кўрсата олмади. Кўплаб нотўғри паслар берди.
- Ҳозир бу саволларга жавоб бериш мен учун қийин. Ўзингиз жавобини бериб бўлдингиз. Кейинги саволга ўтайлик.

- Ўтган йил "Динамо" мисолида ўзбек футболида чиройли ўйин намойиш этадиган жамоани кўргандик. Бу йил шундай жамоа йўқ бўлиб боряпти.
- Бу саволга ҳам жавоб бериш осон эмас. Ўзингиз кўрдингиз, ўйинга ўзимизни бахш этиш етишмади. Мен ҳар доим футболчилар олдига бориб бақира олмайман. Неча дақиқа футбол ўйнаганимизни ҳам аниқ айта олмайман.

- Жамоангиз бир қараса яхши, бир қараса ёмон ўйнаяпти.
- Иккита голни ўтказиб юборганимиз қаттиқ таъсир қилди. Бунақа голларни ўтказмаслик керак эди. Ўйинни бошқатдан кўриб таҳлил қилишга тўғри келади. Сабабларини қидирамиз.

- Ўйиндан олдин майдон ҳолати билан боғлиқ муаамо дуч келганингизни айтдингиз.
- Ўйлашимча, бу майдонда футбол ўйнашга бошқа рухсат беришмаса керак. Бу ҳақда ортиқ гапиришни хоҳламайман.

- Футболчиларда нима учун иштиёқ йўқлигини биламиз. Нима сабабдан ҳомийлар жамоага эътибор бермай қўйди? Бу ғалати эмасми?
- Мен ҳам футболчилар олдида раҳбар-мураббийман. Хўш, бу ўринда уларга нима дейишим керак.? Мана сиз айтинг. Эртага байрам, байрам олдидан ҳаммага гапириб кайфиятни туширишим керакми? Бу билан нимадир ўзгарадими? Футболчиларга эътирозим йўқ. Улар ҳам оиласини ўйлаяпти. Уларнинг оиласини ким боқади? Саволлар бор, жавоби эса тубсизлик.