Спортни сиёсатга аралаштириш мақсадимиз йўқ. Аммо сиёсат спорт, хусусан ФИФА ҳамда ОФКнинг режаларини бузиб юборяпти

Легионерларимиз тўп тепадиган Эрон ва БААдаги вазият ҳақида қисқача.

Эроннинг олий раҳбари 86 ёшли Оятуллоҳ Али Ҳоманаий шанба кунги зарбалар натижасида вафот этганлиги ҳақида расмий хабар берилди. Натижада Эронда 40 кунлик мотам эълон қилинди. Катта эҳтимол Эрон чемпионати ҳам қолган оммавий маданий тадбирлар қатори 40 кунга қолдирилади. Табиийки, Жаҳон чемпионати олдидан бу Эрон ва Ўзбекистон миллий терма жамоаларининг аъзолари учун яхши хабар эмас. Айни пайтда Рустам Ашурматов, Игорь Сергеев, Остон Ўрунов ва Одилжон Ҳамробеков каби асосий таркиб футболчиларимиз Эрон лигасида фаолият олиб боряптилар. Жалолиддин Машарипов эса жароҳатини даволаш мақсадида Эронни анча аввал тарк этиб улгурган эди. Вазиятдан бохабар бўлган қолган футболчиларимиз ҳам Теҳронни тарк этиб олишга улгурганлар. Фақатгина Рустам Ашурматов БААга йўл олган. Қолган футбочиларимиз Эрон ҳаво ҳудуди ёпиқлиги боси Туркияга машинада йўл олганлар. Теҳрондан Туркиянинг энг яқин ўтиш чегараси 890 км. Одилжон Ҳамробеков учун бу масофа 280 кмни ташкил қилган.

Энг аввало бугунги вазиятдан кейин Эрон Ислом Республикасини АҚШда бўлиб ўтадиган Жаҳон чемпионатида иштирок этиш, этмаслиги бош мавзуга чиқди. Бир неча маротаба АҚШга кириш ҳуқуқини берадиган визага рад жавобини олган Эрон футбол федерацияси президенти Мехди Тож, Marca нашрига берган қисқа интервьюсида ҳозирча мамлакат ЖЧдан бош тортмаганлигини такидлаб ўтган. Лекин шундай бўлиши мумкинлигини қайд қилган. ОАВни баён қилишича 2016 йил президент этиб сайланган Меҳди Тож АҚШнинг қора рўйхатидан жой олган шахслардан ҳисобланади.  

Таниқли рефери Ильгиз Танташев эса Қатарда қолиб кетди. У Доҳада ФИФАнинг ҳакамлар учун ташкил қилинган семинарида иштирок этганди.

Яна икки кундан кейин бўлиши керак бўлган Элит Осиё чемпионлар лигасининг нимчорак финал ўйинлари ҳам қолдирилди. 3 ва 4 март кунларидаги ўйинларда "Шабаб Ал Аҳли" - "Трактор", "Ал Дуҳаил" - "Ал Аҳли" (Жидда), "Ал Ваҳда" - "Ал Иттиҳод", "Ал Садд" - "Ал Ҳилол" ўйинлари бўлиб ўтиши керак эди.

Бугун Отабек Шукуров, Азизжон Ғаниев ва Абдулла Абдуллаев фаолият олиб бораётган БАА лигаси ўйинлари ҳам қолдирилди. У ерда ҳам самолётларни учиши тўхтатилган.

Энди асосий савол, агар Эрон терма жамоаси АҚШдаги ЖЧда иштирок этмаса нима бўлади? Бу ерда мен фақатгина ўз тахминларимни айтиб ўтишим мумкин холос. Форсликлар "G" гуруҳида Бельгия, Миср ва Янги Зеландия терма жамоалари билан бир гуруҳдан ўрин олган. Уларнинг барча ўйинлари АҚШда бўлиб ўтиши керак.

Катта эҳтимол Эроннинг ўрнига ОФК плей офф босқичида зафар қучиб ФИФАнинг плей офф йўлланмасини қўлга киритган Ироқ терма жамоаси Эронни ўрнини эгаллайди. Қайтариб ўтаман, агар Эрон ЖЧдан чиқиб кетсагина шундай бўлиши мумкин. ОФК плей-офф босқичида Ироққа мағлубиятга учраган БААни Ироқ ўрнига якуний плей офф ўйинларига юбориши мумкин.

27 март куни Қатар пойтахти Доҳада Испания ва Аргентина жамоалари ўртасида Финалиссима ўйини бўлиб ўтади. Месси ҳамда Ямаль иштирокидаги баҳс учун 90 000 га яқин мухлисни ўз бағрига сиғдира оладиган "Лусаил" стадионидаги чипталар аллақачон сотиб бўлинган.

Нима ҳам дердим, дунёда тинчлик бўлсин. Муҳими футболчиларимиз тинч ва саломат оилалари бағрига етиб келиб, терма жамоамизнинг март ойидаги йиғинларида иштирок этсинлар.

Нодирхўжа Юлдашев