Руслан Жиянов: "Ота-онам ва тоғам Олимпиада ва ЖЧ йўлланмасини қўлга киритадиган терма жамоа сафида ўйнаш насиб этсин, деб дуо қилишарди"

"Навбаҳор" вингери Руслан Жиянов ҳам мазкур мусобақада терма жамоа таркибида ўйнаб, миллий жамоа муваффақиятига муносиб ҳисса қўшди. Наманганликлар матбуот хизмати Жияновдан мусобақадан олган таассуротлари борасида интервью олди.

- Руслан, суҳбатимиз аввалида CAFA турниридаги зафар билан табриклаймиз. Мусобақа таассуротлари борасидаги фикрларингиз билан ўртоқлашсангиз...

- Табрик учун раҳмат. Терма жамоамизнинг ғалабаси барча ҳамюртларимизга қутлуғ бўлсин. Албатта, CAFA мусобақаси кўтаринки руҳда ўтди. Аллоҳга шукрки, кубокни қўлга киритиб, ўз олдимизга қўйилган мақсадга эришдик.

- Турнир давомидаги энг қийин учрашув қайси терма жамоага қарши кечган ўйин бўлди? 

- Турнирдаги барча беллашувлар кескин ва муросасиз руҳда кечди. Лекин ўйинлар ичида энг қийинини танлаш керак бўлса, шубҳасиз, Эрон термасига қарши кечган финал баҳсини айтган бўлардим. Эронликлар бир киши кам бўлиб қолганидан кейин ҳисобни ушлаб қолиш учун ўйнаб, ҳимояни мустаҳкамлади. Бу эса бизга қийинчилик туғдирди. Аллоҳга шукр, якунда халқимиз ва юртбошимиз олдида юзимиз ёруғ бўлиб, ғалаба қозонишга муваффақ бўлдик. 

- Мусобақа ғолибига айланганингизда муҳтарам Президентимиз стадионга ташриф буюриб, футболчиларни табрикладилар ҳамда кубокни ўз қўллари билан футболчиларга топширдилар. Бу воқелик, яъни юртбошимизнинг стадионларга ташрифи қисқа вақт ичида иккинчи марта содир бўлмоқда. Бу нафақат юртимиз футболи, балки, жаҳон футболи тарихида ҳам деярли кузатилмайдиган ҳодиса. Айтинг-чи, Президентимиз томонларидан футболчиларга бўлган ушбу улкан эътибор сизларга қанчалик мотивация берди? 

- Албатта, юртбошимиз томонидан бўладиган эътибор ҳар доим ким бўлишидан қатъий назар инсонга ўзгача ҳис-туйғуларни тақдим этади. Муҳтарам Президентимизнинг ишончлари бизга катта руҳ ва куч берди. Стадионга ташриф буюриб, муваффақиятни биз билан бирга нишонлаганликлари эса биз – футболчиларга янада кўпроқ мотивация беради. Мамлакатимиз футболида эришилаётган ютуқлар замирида албатта юртбошимизнинг миллионлар ўйинига бўлган улкан эътиборлари самараси ётибди.

Фурсатдан фойдаланиб, футболга бераётган улкан эътиборлари ва яратиб берилаётган аъло даражадаги шароитлар учун барча футболчилар номидан муҳтарам Президентимизга ўз миннатдорчилигимни билдираман.

- ЖЧ-2026га қадар миллий терма жамоамиз кўплаб йиғинлар уюштиради. Мундиаль стартини қанчалик кутяпсиз? Жаҳон чемпионатига қадар содир бўлаётган қалб кечинмалари, ҳис-туйғулар билан ўртоқлашсангиз...

- Мундиаль умуман бошқа даража. ЖЧда иштирок этиш ҳар бир футболчининг орзуси. Барча қатори мен буни ҳам интиқлик билан кутяпман.

- Сиз юртимиз тарихида илк марта Олимпиада ва мундиаль йўлланмасини қўлга киритган терма жамоалар футболчисиз. Бу сизга қандай ҳиссиётларни ҳадя этмоқда? 

- Бу энди умуман бошқа нарса. Мазкур туйғуни сўз билан ифодалай олмайман. Аллоҳга шукр, уйда ота-онам, тоғам ҳам болалигимда Олимпиада ва ЖЧ йўлланмасини қўлга киритадиган терма жамоа сафида ўйнаш насиб этсин, деб дуо қилишарди ҳамда бу ҳақда кўп гапиришарди. Қолаверса, синфдошларим билан ҳам кўп ҳазиллашардим ва терма жамоамиз мен ўйнаган даврда Олимпиадада ҳам, мундиалда ҳам иштирок этади, дердим. Ниятларим холис экан, орзуларим бирма-бир рўёбга чиқмоқда. Бунинг учун Аллоҳга шукр дейман. Аллоҳ таолодан нима сўрасангиз, шуни беради. Шунинг учун ниятни катта қилиш керак экан. Келаси йилги ЖЧда ҳам катта натижаларга эришиш ижобат бўлишига ишончим бор.

- Миллий терма жамоамиз бош мураббийи Тимур Кападзе борасида нима дея оласиз?

- Тимур ака билан кўп йиллар жавомида бирга фаолият юритганмиз, жуда ҳам кучли мутахассис. Тимур Тохирович бошқарувида юртимиз футболи тарихида илк марта Олимпиада ва ЖЧ йўлланмасини қўлга киритдик. Тимур аканинг қўл остида футбол ўйнаш осон. У ҳар бир ўйинчининг кўнглига йўл топа олади.

- Мухлисларга тилакларингиз... 

- Ишқибозларнинг борларига шукр, уларнинг дуолари ва қўллаб- қувватлашлари билан тарихий натижаларга бирма-бир эришмоқдамиз. Мухлислар доимо бизни қўллашдан чарчамасин, биз эса уларни хурсанд қилиш учун майдонда барча имкониятимизни ишга соламиз.