Рўзиқул Бердиев: "Нефтчи" чемпион бўлса, қаҳрамонларни майдондан излаш керак эмас. Менинг ҳолатимга тушиб кўрсангиз биласиз"

"Мазмунли ва комбинацион футбол ўйнайдиган жамоалар майдон ҳолати туфайли узун паслар орқали ўйнашга мажбур бўлди. Курашларга бой баҳс бўлди, лекин шунга қарамай икки жамоа ҳам кўплаб вазиятларга эга бўлди. Биз иккинчи бўлимдаги вазиятларимиздан фойдалана олганимизда бошқа натижага эришган бўлардик", — деди Рўзиқул Бердиев баҳс якунлангач.

— Бугун сиз танлаган тактика қанчалик иш берди? Голбанни ҳужумчи позициясида ўйнатиш ўзини оқладими?

— Узун паслар орқали ўйнадик. Ўтган ўйинларда ҳам Голбанни ҳужумга туширган эдик. Кеча ОКМК майдонида машғулот ўтказмаган эдик. Стадионга келганимизда эса фақатгина кураш бўлишини билдик. Стандарт вазиятлар ва узун паслар орқали олдинга ўтиш.

— "Насаф" очко йўқотгани туфайли "Нефтчи" чемпион бўлиб кетиши мумкин, дея тахмин қилмоқда кўпчилик. Ушбу фикрларга муносабат билдириб ўтсангиз ва олдиндаги тўртта учрашувдан нималар кутяпсиз?

— Фикрлар ҳар доим кўп бўлган, аммо барчасини мавсум якунида билиб оламиз. "Нефтчи"ни кўп гапиришмоқда, лекин биз ҳам қараб турмаймиз. Биз анчадан буён мағлуб бўлмадик ва чемпионликка лойиқмиз. "Нефтчи"нинг қанчалик ҳаракат қилаётганини сизлар ОАВ вакиллари ҳам билиб турибсизлар. "Нефтчи" ушбу вазифани амалга оширса, ортдаги инсонлар қаҳрамон бўлади, шекилли. Менимча, гапимни тушундингиз. Агар "Нефтчи" чемпион бўлса, қаҳрамонларни майдондан излаш керак эмас. Улар майдон ортида бўлади. Бу менинг фикрим.

— "Насаф" икки йилдан буён халқаро майдонда яхши ўйнай олмаяпти. Бу ҳафтадаги ўйинда ҳам жамоа асосий таркиб футболчиларидан фойдаланмади. Бу қанчалик тўғри? "Насаф" бу йил ҳам чемпион бўлса, кейинги мавсумда ҳам ОЧЛни қурбон қилаверадими? Бундай ёндашув қанчалик тўғри?

— Биз секин-асталик билан тажриба тўплаб бораяпмиз. Ўтган мавсумда ўз олдимизга чемпионликни асосий вазифа этиб қўйгандик. Ҳозир биз учун дарс бўлмоқда. Икки мусобақада ҳам яхши иштирок этиш учун тенг кучли иккита таркибга эга бўлишингиз керак экан. Бу бизнинг футболимиз учун янги дарс. Менинг ҳолатимга тушиб кўрсангиз биласиз. Мен кеча "Шабаб Ал Аҳли"га қарши ўйнаяпман, аммо хаёлларим кўпроқ бугунги ўйин ҳақида эди. Кимдирга дам беришим керак эди, агар бор таркибдан фойдаланганимда, бугун биз бор-йўғи 20 дақиқа футбол ўйнаган бўлардик. Шу сабабли қийинчиликлар бўлмоқда. Барчага аён, биз кўпроқ эътиборни чемпионатга қаратяпмиз.

— Тўғри, Осиёнинг энг кучли клубларига қарши таркиб жиҳатидан тенглашиб бўлмайди, лекин "Насаф" ўз таркибини кучайтириш учун яна нималар қилиши керак? Трансферларни яхшилаш керакдир? Янги трансферлар Воробей каби ўйин амалиётисиз қолиб кетаётган футболчилар бўлиши керак эмас-ку. "Насаф" ўз таркибини қандай кучайтириши мумкин?

— Биз Воробейга қачондир имконият беришимиз керак эди ва ўша куни имконият бериб, унинг нимага қодир эканлигини билиб олдик. Биз ушбу мусобақада кўп хато қиляпмиз, аммо Элит Лиганинг даражасини ўзингиз ҳам кўриб турибсиз. Қайсидир ўзбек жамоаси Элит ОЧЛда ўйнамоқчи бўлса каттароқ бюджетга эга бўлиши керак ва ўша даражадаги ўйинчилар олиб келиниши керак. Бу сиз иложи йўқ.