Суперлига–2025: Уйда "Нефтчи", меҳмонда "Динамо" чемпион. Рақам ва фактлар

Турнир жадвалига назар ташлар эканмиз, бир ҳақиқат яққол кўзга ташланади: чемпионлик ва юқори ўринлар тақдири уйдаги ишончли ўйин билан бир қаторда, меҳмондаги барқарор натижаларга ҳам бевосита боғлиқ бўлди.

Уйдаги устунлик: Фарғона пешқадам

Ўтган мавсумда ўз майдонида энг кўп очко жамғарган жамоа — Фарғонанинг "Нефтчи" клуби бўлди. Виталий Левченко қўл остида жамоа уй баҳсларида 37 очко тўплаб, рақиблар учун ҳақиқий қўрғонга айланди. Фарғоналиклар мезбон сифатида атиги икки марта мағлуб бўлишди — "Пахтакор" ва "Бунёдкор"га қарши ўйинларда.

36 очко билан иккинчи ўринни "Пахтакор" эгаллади. Қизиқ жиҳати шундаки, "шерлар" "Жар" стадионида бирор марта дуранг ўйнамаган. Иккинчи даврада эса уйда ўтказилган баҳсларда фақат бир марта мағлубият қайд этилди. Умумий ҳисобда, "Пахтакор" мухлислари кўз ўнгида уч бор рақибларига очко улашди.

Кучли учликни якунлаб берган "Насаф" Қаршида фақат бир марта енгилди. "Пахтакор" ва "Нефтчи" ўз майдонидаги 15 та учрашувдан 12 тасида ғалаба қозониб, бу кўрсаткичда тенг натижа қайд этишди. "Чинорлар" эса уй ўйинларида бир марта дуранг ўйнаган.

Уй баҳсларидаги энг паст кўрсаткич "Хоразм" ҳиссасига тўғри келди — 14 та ўйинда атиги икки ғалаба. Голлар нисбатига келсак, бу борада "Пахтакор" етакчи бўлди: +24. "Шерлар" 15 та учрашувда 34 та гол уриб, бор-йўғи 10 тасини ўтказиб юборган. "Нефтчи" эса ўз майдонида энг кам гол ўтказган жамоа сифатида қайд этилди — 9 та.

Аксинча, энг салбий тўплар нисбати "Шўртан"да кузатилди — −12. Ғузорликлар мезбон мақомида 29 та гол ўтказиб, бу кўрсаткичда мавсум антирекордчиларидан бирига айланди. Уй ўйинларида энг кам гол урган жамоа эса "Машъал" бўлди — 12 та.

Меҳмондаги барқарорлик: "Динамо"га тенг келадигани топилмади

Сафар ўйинлари эса жадвалнинг иккинчи, аммо ҳал қилувчи қиррасини очиб берди. Меҳмонда энг кўп очко жамғарган жамоа — "Динамо". Оқ-кўклар 15 та сафар учрашувида 29 очко тўплаб, рақиб майдонларида ҳам ўз сўзини ўтказа олганини исботлади.

Меҳмонда энг кам мағлуб бўлган жамоа сифатида "Нефтчи" алоҳида ажралиб турди. Фарғоналиклар сафарда икки марта мағлуб бўлишди . Бу ҳолат жамоанинг нафақат уйда, балки меҳмонда ҳам қанчалик барқарор ўйнаганини кўрсатади.

Ҳужумкорлик борасида сафар баҳсларида энг яхши кўрсаткич "Пахтакор"га тегишли — 25 та гол. "Динамо" ҳам меҳмонда 24 марта рақиблар дарвозасини ишғол қилиб, етакчилар сафида қайд этилди. Ҳимояда эса "Нефтчи" яна бир бор пешқадам: сафар ўйинларида жами 10 та гол ўтказилган.

Меҳмон ўйинларида тўплар нисбати бўйича энг яхши кўрсаткич "Динамо"га тегишли — +9. Энг салбий баланс эса "Машъал" ва "Шўртан" жамоаларида кузатилиб, улар −18 натижа билан мавсумни якунлашди. Сафарда энг қийин аҳволга тушган жамоа ҳам "Шўртан" бўлиб, 15 та ўйинда ғалаба қозона олмади ва бор-йўғи 5 очко тўплади.

Суперлига–2025 рақамлари шундан далолат берадики, чемпионлик йўли фақат уйдаги устунлик орқали эмас, балки меҳмондаги барқарор натижалар ҳисобига ҳам очилади. "Нефтчи" уйдаги ишончли ўйини ва сафардаги кам мағлубиятлари билан чемпионлик формуласига энг яқин жамоа бўлди. "Динамо" эса меҳмондаги очколари билан мавсумнинг энг барқарор сафар жамоаси сифатида тарихга кирди.