Собиқ ҳакам Фернандес Винисиуснинг "Алавес" жарима майдончасида йиқилиши ҳақида: "Яққол пенальти"

"Мадрид" якшанба куни Ла Лиганинг 16-тури доирасида сафарда "Алавес"ни мағлуб этди (2:1). Иккинчи бўлим сўнгида рақиб жарима майдончаси ичида Винисиус йиқилганидан сўнг "Реал" фойдасига пенальти белгиланмади. Учрашувни Виктор Гарсия Вердура бошқариб борди.

"Науэль Теналья Винисиуснинг болдирига тегиб кетди, менинг фикримча, бу яққол пенальти эди.

Аммо нима учун Гарсия Вердура ўн бир метрли жарима зарбасини белгиламади? Менда иккита назария бор. Биринчиси – ҳакам контактни кўрмади ва Винисиус яна жарима майдончасида симуляция қилди деб ўйлади. Иккинчиси – у контактни кўрди, лекин буни пенальти белгилаш учун етарли эмас деб ҳисоблади.

Мен бу иккинчи вариант деб ҳисоблайман ва нима учунлигини тушунтираман. Бундай вазиятларда VAR ҳаками майдондаги ҳакамдан: "Нимани кўрдинг?", деб сўрайди. Агар ҳакам контакт бўлмади ва Вини шунчаки йиқилди деб жавоб берганида, VARнинг аралашуви муқаррар бўларди, чунки контакт яққол ва аниқ бўлгани сабабли рефери вазиятни нотўғри баҳолаган бўларди.

Шунинг учун мен кўпроқ иккинчи вариантга мойилман. Менимча, Гарсия Вердура VAR хонасидаги ҳамкасби Пабло Гонсалес Фуэртесга контактни кўрганини, аммо уни пенальти белгилаш учун етарли эмас деб ҳисоблаганини айтган. Бундай ҳолларда, бу майдондаги ҳакамнинг вазиятни қандай талқин қилиши масаласи бўлгани учун, VAR одатда аралашмайди.

Буларнинг барчаси кеча оқшом энг кўп берилган саволга жавоб бўлади: нима учун VAR аралашмади? Мен айтганимдек: кўпроқ футбол ва камроқ симуляция бўлиши керак", – деди Фернандес.