Отабек Нарзуллаев: "Қашқадарё чемпион бўлишини хоҳлаймиз"

– Ўйин ҳақида фикрингиз…

– Ўйинни яхши бошладик. Вазиятлардан фойдалана олмадик. Хатолар эвазига голлар ўтказиб юбордик. Иккинчи бўлимда вазиятни ўнглашга ҳаракат қилдик. Афсуски, ҳужумларда охирги нуқтани қўйишга оқсаяпмиз. Қониқарлиси, иккинчи бўлим майдонга чиққан футболчиларнинг барчаси ўйинни кучайтирди. Ёшларга имкон бердик, улар ўзини кўрсатди. Кўпгина вазиятларда тўп дарвоза устуни ва тўсинига тегди. Ўша вазиятлар голга айланганда, очко қўлга киритардик.

– "Машъал"нинг ғалабасиз серияси 5 тага етди. Жамоанинг Суперлигада жон сақлаб қолиши учун очколар сув ва ҳаводек зарур. Аммо муборакликларни "Насаф" ва ОКМК каби етакчи жамоалар кутиб турибди. "Машъал" мана шу рақибларга қарши "сюрприз" ҳозирлай оладими ёки шунчаки мавжуд куч ва услубга таянадими?

– Биз ҳар ўйинда ғалаба учун майдонга чиқамиз. Бизга омад кулиб боқмаяпти. Шундай ўйлайман. Футболчилар ҳаракат қилишяпти. Кичик хатолар эвазига голлар ўтказиб юборяпмиз. Шунинг эвазига мағлубиятга учраяпмиз. Лекин ўйин борасида яхши ҳаракат қиляпмиз. Бугунги учрашувни таҳлил қилган ҳолда кейингисида яхшироқ ҳаракат қиламиз. Суперлигада қолишга ҳаракат қиламиз.

– Суперлигада чемпионлик учун "Нефтчи" ва "Насаф" асосий даъвогарлар бўлиб турибди. Бир вилоят вакили сифатида "Насаф"нинг чемпион бўлишини хоҳлармидингиз ёки аксинча?

– Албатта, "Насаф" чемпион бўлишини хоҳлайман. Ҳа, "Нефтчи" сифатли футболчилар эвазига кучайган, яхши шароитга эга. Бироқ "Насаф" Ўзбекистонда ўз ўйин услубига эга жамоалардан бири саналади. Тақвимга қарасак, "Насаф"ни қийинроқ рақиблар кутяпти. Қолаверса, бу жамоа Элит Осиё Чемпионлар лигасида иштирок этяпти. Бу эса футболчиларнинг толиқишига сабаб бўлмоқда. Албатта, биз Қашқадарё чемпион бўлишини хоҳлаймиз. 

– Муҳаммадали Алиқулов, Эргаш Исмоилов, Самандар Очилов ва бошқа етакчиларнинг шартномаси йил сўнгида якунига етади. Улар билан битим узайтириладими ёки таркибни янгилаш кўзда тутилганми?

– Келаси йил таркибни анча ёшартириб, янгилашга ҳаракат қиламиз. Селекция ишлари олиб борилмоқда. 

– Таркибни ёшартиришга тўхталдингиз. Сиз "Машъал"нинг ёшлар жамоаларида ҳам ишлагансиз. Бир вақтлар "Машъал" академиясидан бўлғуси терма жамоа футболчилари етишиб чиқарди. Ҳозирда эса бу жараён тўхтаб қолгандек. Бунга сабаб нима деб ўйлайсиз?

– Академияда яхши савиядаги футболчилар бор. Турли ёшдаги терма жамоа мураббийларни уларни кузатиши керак. Битта ўйинни кузатиш билан кифояланмасликлари керак. Уларни жалб қилиб, синчковлик билан кузатиш керак. Шундагина уларнинг қобилияти ҳақида тасаввурга эга бўлади.