Nike, Adidas ёки Under Armour? Жаҳон брендлари Мбаппе учун курашга киришди

"RMC Sport" хабарига кўра, Мадриднинг "Реал" клуби ва Франция терма жамоаси ҳужумчиси Килиан Мбаппенинг спорт анжомлари ишлаб чиқарувчи Nike билан амалдаги шартномаси 2026 йил ёзида якунланади.

Манба маълумотларига қараганда, Америка компанияси футболчи билан ҳамкорликни давом эттиришни режалаштирмоқда ва бунинг учун зарур ресурсларни излаш ишларини бошлаган.

Nike’дан ташқари, Мбаппе билан шартнома тузишга бошқа йирик спорт кийимлари брендлари — Adidas ва Under Armour ҳам қизиқиш билдирмоқда. Германиянинг Adidas компанияси "Реал"нинг техник ҳомийси ҳисобланади, бу эса "қаймоқранглилар" ҳужумчиси билан ҳамкорлик қилишга бўлган қизиқишни изоҳлайди.

Қайд этилишича, Мбаппе билан шартномани узайтириш бўйича музокаралар билан бир вақтда, Nike ПСЖ вингери Дезире Дуэга ҳам қизиқиш билдирмоқда. ОАВ маълумотларига кўра, франциялик футболчи ҳозирча бирор экипировка ишлаб чиқарувчи билан амалдаги шартномага эга эмас ва тижорий фаолиятлардан четда турибди.

Аввалроқ Мбаппе Роналдунинг рекордини такрорлаган эди.