Миржалол Қосимов: "Охиригача курашиш - спорт принципи"

"Икки жамоа ҳам ғалаба учун майдонга чиққанди. Барча яхши ўйин бўлишини кутган эди. Очиқ ва қизиқарли ўйин бўлди. Рўзиқул билан ҳам майдон сифати ҳақида гаплашдик. Икки жамоа ҳам маъноли футбол намойиш этишга интилади ва бугунги майдон ҳолати бизга халал берди" - деди Миржалол Қосимов баҳс якунлангач.

— "Насаф"га бугун очко кўпроқ керак эди. ОКМКда бугун ўтган ўйинлардагидан кўра кўпроқ иштиёқ бормиди ёки жамоангиз ҳар бир рақибга қарши бир хил ҳолатда майдонга тушадими?

— Рақибнинг ким эканлиги фарқи йўқ, аммо футболчига қандай етиб бориши муҳим. "Нефтчи"га қарши ўйиндаги статистикани қарасангиз биз унчалик ёмон ўйнамадик. Андижонда ва "Қўқон-1912"га қарши ўйинда ҳам. Футболда руҳий жиҳат муҳим. Футболда ҳар қандай вазият бўлади. Бизнинг жамоада қандай ҳисоб қайд этилишидан қатъи назар ҳакамнинг сўнгги ҳуштагига қадар ўйнаймиз. Бу яхши жиҳат. Охиригача курашиш бу спорт принципи. Ҳеч қачон қўл силтаб кетмаслик керак. Бугун ҳам Азизда ва Авазда имкониятлар бўлди, улардан фойдаланганимизда ҳисоб бошқача бўларди. Ҳеч қачон тўхтаб қолиш керак эмас, барибир қачондир ўз мевасини беради.

— Захирадан майдонга туширган футболчиларингизнинг ўйинга қўшилиб кетишида муаммо кузатилди. Ушбу қарор хато бўлдими?

— Бўлди. Голдан олдинги вазиятда Аҳмад тўпни Ҳуршидга берса бўларди, чап қанотда бўшлиқ бор эди. У эса кутилмаганда Авазга пас берди. Ҳозир эслай олганим, вазиятни яна бир кўриб чиқиш керак. Масалан, Фарғонада захирадан ўйинга қўшилганлар ўйинга яхши киришиб кетди. Захирадан ўйинга қўшилганлар ўйинни кучайтира олиши керак. Ҳозир бир футболчига тўнкаб қўйиш нотўғри бўлади. Футбол жамоавий ўйин.