Котрина Кулбите: "Непал бизга қарши бошқача ўйин қилиши аниқ"

"Қийин ўйин бўлди. Лаос чуқур ҳимояланди ва бизга анча ноқулайлик туғдирди. Ҳимояни ёриб ўтиш эса ҳеч қачон осон бўлмаган. Шунга қарамай вазиятлар яратдик ва ғалаба қозондик. Энди тўлиқ эътиборни кейинги учрашувга қаратишимиз керак" - дея фикр билдирди Котрина Кулбите Лаосга қарши ўйин ҳақида.

- Ўтган учрашув билан солиштирганда бир нечта ротацияларга қўл урилди. Таркибдаги ўзгаришларга нима сабаб бўлди?

- Ҳар бир учрашувда ротация қилиб борамиз. Бу одатий ҳолат. Ўйиндан олдин ҳеч нарсани тўлиқ режа қилиб бўлмайди. Биз ғалаба қозонишимиз керак эди ва шунга ҳаракат қилдик.

- Непалга қарши ўйинда ғалаба қозонишимиз учун нималар қилишимиз керак деб ўйлайсиз? Рақиб жамоанинг кучли жиҳатларига тўхталиб ўтсангиз...

- Непал билан очколар ва тўплар нисбати ҳам бир хил. Икки жамоа ҳам ғалаба қозонишни хоҳламоқда. Биз Непалнинг биринчи турдаги ўйинини таҳлил қилиб чиқдик, унга қадар ўтказилган ўйинларни ҳам. Непал бизга қарши бошқача ўйин қилиши аниқ. Мен рақибдан ўрта чизиқдаги блок ва қарши ҳужумларга асосланган ўйинни кутмоқдаман. Сабаби уларнинг таркибида тезкор ҳужумчи бор. У қиз Францияда ўйнайди. Қандай ўйин бўлишидан қатъи назар, ўзимиз яхши ўйин намойиш этишимиз керак.