Жавоҳир Расулов: “Нефтчи” бир кун келиб яна кучли бўлиб қайтишига ишонаман”

24 ёшли футболчи бир неча йил жамоасининг асосий таркиб ўйинчиси сифатида гавдаланиб келди. Ҳозирда Расулов операциядан сўнг тикланиш жараёнида. Яқинда “Нефтчи”нинг тарқалиб кетгани ҳақида гап-сўзлар урчий бошлади. Шу ва бошқа айрим саволларга жавоб олиш мақсадида Жавоҳирга мурожаат қилдик.

- Жавоҳир, янги йилни яхши кутиб олдизми? Операциядан сўнг аҳволлариз яхшими?
- Ҳа, раҳмт мени эслаганиз учун ўз ташаккуримни билдираман. Янги 2018 йилни оилам даврасида кутиб олдим. Фурсатдан фойдаланиб, янги йил барча юртдошларимизни омадли ва барокатли келишини тилаб қоламан. Ҳозирда уйдаман. Ўткан ойда Тошкентда оёғимни операция қилдиргандим. Худога шукур, мен учун барчаси ортда қолди. Аста-секин тикланиш жараёнини бошдан ўтказяпман. Шифокорларнинг кўрсатмаларига биноан енгил машқларни олиб боряпман.

- Оғир жарохатга йўлиқишингиз аслида қачон юз берганди?
- Ўтган мавсум биринчи давра ниҳоясига етиб, танаффус чоғида Тошкентдаги йиғин давомида “Сўғдиёна”га қарши синов-назорат ўйинида кутилмаганда, оёғимнинг тизза қисмидан жарохат олиб, сафдан чиққандим. Маълум муддат клубимиз шифокорлари назоратида бўлдим. Муолажалар қилинди. Лекин бу билан ҳаммаси яхши бўлиб кетмади ва жарохат мени кейинчалик ҳам қийнаб келди. Малакали шифокорлардан маслаҳат олдим. Барибир операция қилдиришим зарур бўлиб чиқди. Ҳозир ҳаммаси кўнгилдагидек ва ўзимни жуда яхши ҳис қиляпман.  

- Қачон сизни яна яшил майдонда кўрамиз?
- Шифокорларнинг берган кўрсатмалари бўйича операциядан кейин тикланиш жараёнини бошлаб юбордим. Ҳаммаси босқичма-босқич амалга ошади. Насиб қилса 15 январдан майдонга чиқиб, югуришни бошлайман.

- Футболда баъзида салбий холатлар ҳам бўлиб туради. Хусусан футболчи жарохат олиб сафдан чиқса, унга нисбатан эътибор кескин пасайиб кетади. Бу аччиқ хақиқат. Афсуски айрим жамоаларда шу холатни кўриш мумкин. Айтингчи, “Нефтчи” ўзининг асосий таркиб ўйинчиси жарохатга йўлиқгач, қўллаб-қувватладими?
- Тўғри айтасиз, бугун майдонда зўр ўйнаб турсангиз, клуб раҳбарияти бошида кўтариб юради. Лекин эртага бахтсиз ходиса юз бериб, сафдан чиқсангиз, улар билан салом-алиқ ҳам узилиб қолиши хеч гап эмас экан. Очиғини айтганда, ўткан йили биринчи даврадан кейин олдимда 2-3та клублардан жиддий таклифлар бор эди. Ўша пайтда бош мураббий Вадим Абрамов менга ишончи юқорилигини билдириб, жамоадан кетишимга рухсат бермаганди. Кейинчалик жарохатга йўлиқдим. Шундан сўнг воқеалар ривожи афсуски салбий томонга кескин ўзгариб кетди. Оёққа туришим учун ўзим ёнимдан муолажа қилиб, операциясини ҳам ўз чўнтагимдан қилдирдим. Бу нолиш эмас. Шунчаки инсонга бўлган эътибор ўзгариб кетгани алам қилди. Хаётда шу каби холатлар, келажак учун дарс бўларкан. Шу ўринда фарғоналик мухлисларга миннатдорчилик билдираман. Қанчадир “Нефтчи” учун қанчалик даражада ўйнаган эканман, ишқибозлар билишиб, кун ора телефон орқали хол аҳвол сўраб туришгани ҳам бўлди. Бу менга оғир пайтда жуда яхши қўшимча куч бағишлади. Менимча энг катта ютуқ ҳам мухлислар эътибори бўлса керак.

- Ўтган ҳафта “Нефтчи”дек ўз тарихига эга бўлган жамоани тарқалиб кетгани ҳақида гап-сўзлар урчий бошлади. Жамоа аъзоси сифатида бунга қандай муносабатдасиз?
- Бу хабарни мени ҳам интернет тармоғи орқали ўқидим. Албатта, “Нефтчи”дек жамоанинг бутунлай тарқалиб кетишини хеч ким кутмаган. Шу қатори мен ҳам. Лекин бир кун келиб “Нефтчи” барибир кучли жамоа сифатида яна қайтади. Мен бунга ишонаман. Ахир бу жамоа Осиёда ўз ном қозонган ва ўз ўрнига эгадир. Афсуски Фарғонанинг бош жамоаси ўз тарихида илк бор биринчи лигага тушиб кетди. Бу жуда қайғули.  

- Ўзингизни келгуси режаларингиз қандай? Яна жамоада қолиб фаолиятингизни давом эттирасизми ёки муҳитни ўзгартирмоқчимисиз?
- Олий лиганинг айрим клублари билан оғзаки равишда музокара ўтказаётгандик. Жарохатдан кейин афсуски бу жараён вақтинчага тўхтаб турибди. Бу табиий ва вақтинчалик холат деб биламан. Ҳали ёшман ва ўз кучимга ишонаман. Асосийси операция жараёни ижобий ўтказилди. Энди тезроқ аввалги спорт формамга кириб олишни ўйлаяпман. “Нефтчи” билан амалдаги шартноман ниҳоясига етди. Албатта бу йил ҳам олий лигада ўйнаш бўлган иштиёқим юқори. Агарда бирор бир жамоа мехнатимга қизиқса, қўлимдан келганича ёрдам бераман.