Жамолиддин Раҳматуллаев: "U-20 Жаҳон чемпионатининг Озарбайжон ва Ўзбекистонга берилиши катта мотивациядир"

Мазкур мусобақада 2007-2008 йилда туғилган футболчилардан ибрат терма жамоамиз иштирок этади. Мазкур мавзу юзасидан Ўзбекистон U-18 терма жамоаси бош мураббийи Жамолиддин Раҳматуллаев фикрлари билан ўртоқлашди. 

"Куни кеча FIFA биз учун ёқимли хушхабарни эълон қилди: 2027 йилда биз Озарбайжон билан биргаликда 20 ёшгача бўлган футболчилар ўртасидаги Жаҳон чемпионатини қабул қиламиз. Бу жуда нуфузли мусобақа ва бежизга бизга ишониб топширилмади. Юртимизга FIFA президенти Жанни Инфантино бир неча бор ташриф буюриб, футболга давлат раҳбари даражасида эътибор қаратилганини ўз кўзлари билан кўрди. Сўнгги ташрифи давомида эса янги қуриб битказилган Олимпия шаҳарчаси ва Ўзбекистон футбол ассоциациясининг замонавий футбол базаси билан ҳам танишган эди. Шунингдек, Ўзбекистонда юқори савияда ташкил этилган U-20 Осиё кубоги ҳамда футзал бўйича катталар ўртасидаги Жаҳон чемпионати ҳам бу қарор қабул қилинишига катта туртки бўлганини бемалол айта оламиз.

Бу хабар нафақат футбол жамоатчилигини, балки футболсевар халқимизни ҳам жуда хурсанд қилди. Хурсандчилигимиз бардавом бўлсин!

Шахсан мен учун ҳам бу жуда қувонарли янгилик, чунки бу U-20 жамоамиздаги йигитлар учун катта мотивация ва масъулиятдир. Тўғри таъкидлаганингиздек, аввал 2006 йилда туғилган футболчилар билан U-17 Жаҳон чемпионатида иштирок этган эдик. Ўша таркибдан Азиз Толқинбеков, Беҳруз Каримов ва Қувонч Абраев бугунги жамоамизга ҳам номзод ҳисобланадилар.

Тайёргарликка келсак, олдимизда 9 ва 12 октябрь кунлари Озарбайжон билан Тошкентда халқаро ўртоқлик ўйинлари белгиланган. Кейинги босқичда эса УФА билан ҳамкорликда батафсил тайёргарлик режасини тузиб оламиз. Жамоанинг асосий йирик синовлари 2026 йилдаги Осиё кубоги саралаш босқичи ҳамда 2027 йилдаги Осиё ва Жаҳон чемпионатлари бўлади", – дейди Жамолиддин Раҳматуллаев.

Абдулазиз Искандаров