Бирга-бир вазиятларда жамоасини қутқарган посбон, хет-трик қайд этган футболчи, жамоаси камбэк қилган мураббий — Суперлигада 8-турнинг энг яхшилари

Championat.asia сайти талқинига кўра 8-турнинг энг яхши дарвозабони – Умиджон Ҳамроев ("Машъал")

Бу турда "Машъал" "Бухоро" меҳмони бўлиб, 2:1 ҳисобида ғалаба қозонди. Муборакликлар посбони сэйвлари билан қойил қолдирди, шунингдек, бир қатор бирга-бир вазиятларда жамоаси жонига ора кирди. Шу орқали у Championat.asia ижодкорлари томонидан 8-турнинг энг яхши дарвозабони дея эътироф этилди.

Championat.asia сайти талқинига кўра 8-турнинг энг яхши мураббийи – Миржалол Қосимов (ОКМК)

ОКМК "Андижон"га қарши 8-тур тўқнашувида фантастик камбэк намойиш қилди. Миржалол Қосимов шогирдлари танаффусга 1:3 ҳисобида боши эгик ҳолда йўл олганига қарамай, иккинчи таймда буткул бошқача ўйин кўрсатиб, иродали ғалабага эришди (4:3). Шу тариқа тажрибали мураббий 8-турнинг энг яхши мураббийи деб топилди.  

Championat.asia сайти талқинига кўра 8-турнинг энг яхши футболчиси – Хуршид Ғиёсов (ОКМК)

ОКМК бу тур Олмалиқда ўзига хос камбэк кўрсатди. Олмалиқликлар 4:3 ҳисобида ғалаба қозонган баҳсда Ғиёсов хет-трик қайд этди. У бир марта бош билан гол урган бўлса, икки марта пенальти орқали дарвозани ишғол этди. Шу тариқа Хуршид Ғиёсов 8-турнинг энг яхши футболчиси сифатида эътироф қилинди.

Championat.asia сайти талқинига кўра 8-турнинг энг чиройли голи муаллифи – Илҳом Ваҳобов ("Қизилқум")

"Қизилқум" бу тур ўз майдонида "Навбаҳор"ни қабул қилиб, 3:2 ҳисобида ғалабага эришди. Мезбонларнинг биринчи голига чап қанот ҳимоячиси Илжомжон Ваҳобов муаллифлик қилди. У майдон марказида тўпни эгаллаб, катта тезликда олдинга борди ҳамда чап оёғида дарвозабон учун қийин бўлган нуқтани нишонга олди. Ушбу тўпни киритган Илҳом Ваҳобов Championat.asia сайти талқинида турнинг энг чиройли гол муаллифи деб топилди.