"Барселона" "Айнтрахт"дан мухлислар етказган зарарни қоплашни талаб қилмоқда

"Барселона" "Айнтрахт"дан Чемпионлар Лигаси умумий босқичининг 6-тур ўйинида (2:1) "Spotify Камп Ноу"да мухлислари томонидан етказилган 6 минг евро миқдоридаги моддий зарарни қоплашни талаб қилди, деб хабар бермоқда RAC1.

"Айнтрахт" мухлислари ўзларини "Барселона" мухлисларидан ажратиб турувчи тўсиқнинг бир қисмини бузишган, ўриндиқлар ва ҳожатхоналарга зарар етказишган. Бундан ташқари, улар еттита тутун ёқиб, "Барселона" мухлислари томонга спиртли ичимликлар ва пешоб солинган стаканларни отишган, бу эса трибуналарда норозилик ва кескинлик тўлқинини келтириб чиқарган. Ҳодиса оқибатида стадиондаги вазият ниҳоятда кескинлашган.

"Барселона" Чемпионлар Лигаси умумий босқичида 6 та ўйин ўтказиб, 10 очко тўплаган ва турнир жадвалида 15-ўринни эгаллаб турибди. "Айнтрахт" эса жадвалнинг қуйи қисмида жойлашган бўлиб, жамоанинг ҳисобида 4 очко бор.