Александр Хомяков: "Чиройли ўйинларимиз ҳали олдинда"

- Ўйин ҳақида фикрингиз?

- Аввало барчани янги мавсум старти билан табриклайман. Дастлабки учрашувни ютиб олдик ва бу билан ўз мухлисларимизни табриклайман. Уйда тўп тепдик ва мухлислар бизни яхши қўллаб туришди. Биринчи таймда устунлик жамоамиз томонида бўлди ва гол ҳам уриб олдик. Аммо иккинчи бўлимдаги устунлик рақиб томонга ўтди, шундан сўнг ўйинимиз қовушмади. Бунинг ҳам ўзига яраша сабаблари бор, биринчи ўйинда бу каби ҳолат кузатилади. Биз ҳисобни ушлаб қолишга ҳаракат қилдик, чунки мақсадимиз биринчи ўйинни ютиб олиш эди. Йигитларга раҳмат, ҳамма ўйинга ўзини бахш этди, энди кейинги учрашувга ҳозирлик кўрамиз.

- Янги мавсум олдидан ўзингиз хоҳлаган барча футболчиларни жамоага таклиф эта олдингизми?

- Вазият шундай бўлдики, бизда қишки таътил қисқа бўлди. Ўтган йил декабрнинг ярмида мавсумни тугатдик, плей-офф ўйинларида ўйнадик. Ўша пайтдаёқ бу мавсум учун режа тузишни бошлаб юборгандик. Селекция ишлари умуман тўхтамади, ўзимиз хоҳлаган таркибни туза олдик. Чиройли ўйинларимиз ҳали олдинда.

- Ёшларга кўпроқ имконият берганингиз бугунги баҳсда кўринди. Легионерлар эса захирада қолишди. Улар ҳали жамоага тўлиқ қўшилиб кетмадими?

- Биз машғулотлардан келиб чиқиб таркиб тузамиз. Ўйинчиларни маҳаллий ва хорижликка ажратмаймиз. Ким тайёр бўлса, асосий таркибда шу тушади. Тўғри, Европа давлатларидан келган футболчилар мослашув жараёнини бошдан кечиради. Бу одатий ҳол. Уларга ҳали вақт керак. Бугун эса шу таркибдан фойдаланишга қарор қилдик. Айтиб ўтганимдек, олдинда ўйинлар кўп ва ҳаммага ўзини кўрсатиш учун вақт бўлади.