Акмал Рустамов: "Бир оила бўлиб ўйнасак, бизни ҳеч ким юта олмайди"

- Ўйин ҳақида фикрингиз?

- Бугун иккинчи турни ўтказиб олдик. Ўйин қийин бўлишини билардик, чунки "Андижон" ҳам водийнинг бошқа жамоалари қатори доим ютуққа ҳаракат қилади. Қолаверса рақиб таркиби анча кучайган. Ғалаба билан мухлисларимизни, клубимиз раҳбариятини ва барча навоийликларни табриклайман. Биринчи бўлим учун йигитларга алоҳида раҳмат. Бугун ҳамма борини бериб ўйнади. Берилган кўрсатмалар тўғри бажарилгани учун ғалаба қозондик деб ўйлайман.

- "Андижон"нинг дастлабки турдаги ўйинини кўрган бўлсангиз, қандай таассурот қолдирганди?

- Биз илк турни "Пахтакор"га, "Андижон" эса "Сўғдиёна"га қарши ўтказди. "Пахтакор" билан ўйнаб бўлганимиздан сўнг навбатдаги учрашувга ҳозирлик кўра бошладик. "Андижон"ни яхшилаб ўрганишга ҳаракат қилдик. Таркибида юлдузлар бор, лекин эътибор берган жиҳатимиз "Андижон" тўпни асосан ҳаводан ўйнар экан. Боаке яхши ҳужумчи, аммо уни тўпсиз қолдиришга ва майдон марказини эгаллашга ҳаракат қилдик. Бу эса ўз мевасини берди.

- Григол Чабрадзенинг ҳолати қандай?

- Чабрадзе грузиялик яхши легионерларимиздан бири. У ўзидан илиқ тассурот қолдиришга ҳаракат қиляпти. У Туркиядаги йиғинда жароҳат олиб қолди, шу боис "Пахтакор" билан захирада қолдирдик. Лекин у бизга жуда керакли ўйинчи. Афсуски, бугун яна жароҳат олди.

- Сизнингча, бугунги учрашувнинг энг яхши футболчиси ким?

- Алоҳида бирон бир ўйинчини ажратиб кўрсатмоқчи эмасман. Бутун жамоа яхши ҳаракат қилди. Биз бир оила бўлишга ҳаракат қиляпмиз. Агар оила бўлиб ўйнасак, бизни ҳеч ким юта олмайди.

- Асрор Ғофуровни ўтган учрашув ҳимояда кўргандик, бугун эса ярим ҳимояда ўйнади.

- Бизда шундай футболчилар борки, улар турли нуқталарда ўйнай олишади. Бу ҳам жамоамиз фойдасига деб ўйлайман.

- Илҳом Ваҳобов аввалги мавсумда асосий таркиб футболчиси эди.

- Илҳом Ваҳобов билан Шоҳруз Норхоновнинг жароҳати биз кутгандан жиддий бўлиб чиқди. Уларни тезроқ асосий таркибга қайтариш устида иш олиб боряпмиз.

- Жамоангиз гол ўтказиб юборгач, яна футбол ўйнай бошлади. Бунгача нима халақит берди?

- Савол тушунарли. Ўйиндан олдин ҳар доим футболчилар олдига кўрсатма қўямиз. А режа, Б режа кабилар бўлади. Лекин ҳаммаси доим сиз ўйлагандек кечмайди. Гол ўтказиб юборганда нимадир ўзгартиришга тўғри келади. Бугун захирадан ўйинга қўшилганлар ишончни оқлашди.