Jo'ra Xonnazarov turniri. “Bunyodkor-2001” kumush medallar bilan kifoyalandi

Ushbu qarama-qarshilikda tomonlar murosasiz kurash olib borishdi. Hujumkor ruhda boshlangan o'yinda birinchi bo'lib hisobni ochish “qaldirg'ochlar”ga nasib etdi. Abzal Bobojonov birga-bir vaziyatda raqib posbonini aldab o'tib, darvozani aniq ishg'ol qildi – 1:0.

Tanaffusdan keyin “Paxtakor” futbolchilari bor etiborlarini hujumga qaratishdi. Natijada, markazidan yorib kirgan raqib futbolchisi hisobdagi muvozanatni tikladi – 1:1. Bu orada “qaldirg'ochlar”dan Xumoyun Islomov ikkinchi marta hakam tomonidan ogohlantirilib, maydonni erta tark etdi. Mazkur chetlatish “sherlar” uchun ayni muddao bo'ldi. Qolgan daqiqalarda yanada bosimni oshirgan “Paxtakor” bellashuv yakunlanishiga ikki daqiqa qolganida g'alaba to'pini kiritdi.

SHu tariqa, Murod Otajonov boshchiligidagi “qaldirg'ochlar” Jo'ra Xonnazarov xotirasiga bag'ishlab o'tkazilgan xalqaro turnirda ikkinchi o'rin bilan kifoyalanishdi.

Uchinchi o'rin uchun kechgan bahsda “Lokomotiv” futbolchilari “Andijon”ni mag'lubiyatga uchratishdi.

Final yakunlangandan keyin, tashkilotchilar turnirning eng yaxshilarini taqdirlash marosimini o'tkazishdi.

Eng yaxshi darvozabon: Jasur Sobirov (“Andijon”)
Eng yaxshi himoyachi: Javohir Islomov (“Lokomotiv”)
Eng yaxshi yarim himoyachi: Davron Anvarov (“Bunyodkor”)
Eng yaxshi hujumchi: SHoislom Muhitdinov (“Paxtakor”)
Eng yaxshi o'yinchi: Bekzod SHamsiev (“Paxtakor”)

Sovrindorlarni Jo'ra Xonnazarovning oila azolari va yaqinlari taqdirlashdi.