Yorqin Nazarov: "Oldinda ikki tur qolganiga qaramasdan, bizda imkoniyat bor"

- O'yin haqida fikringiz...

- Bu jamoalar o'rtasidagi o'yin hamisha derbi maqomini olgan. Yaxshi bellashuv bo'ldi. Yigitlarga minnatdorchilik bildiraman, ular yirik hisobga qaramasdan, qo'lidan kelgan barcha ishni amalga oshirdi. Oldinda ikki tur qolganiga qaramasdan, bizda imkoniyat bor. "Andijon"dan 3 ochko ola bilsak, "Qizilqum"ga qarshi bahs hal qiluvchi o'yinga aylanadi. Mazkur uchrashuvlarga jiddiy tayyorgarlik ko'ramiz. "Neftchi"ni g'alaba bilan tabriklayman. 

- "Turon" mag'lubiyatga uchrayotgan paytda hujumchi Humoyun Murtozaevning zaxiraga olinishi kutilmagan holat bo'ldi. Qolaversa, uning o'rniga yarim himoyachi maydonga tushirildi. Buning sababi nimada?

- Murtozaevning jarohati bor edi, u oyog'idagi gipsni yaqinda echdi. Mashg'ulotlardagi shijoatini ko'rib, uni o'yinga tayyor deb o'ylagandik. Biroq jarohat unga o'zini to'liq ko'rsatishi uchun xalaqit berdi. SHu bois, uni almashtirdik. Yarim himoyachi o'yinga qo'shilganiga qaramay, Xolmurodovni hujumga o'tkazdik. Bugun himoyaga urg'u bermay, uchta hujumchi bilan maydonga tushgandik.