Ulug'bek Bakaev: "Bugungi holatimizda qo'lga kiritilgan bir ochko oltinga teng"

- Gapni ruxiy tushkunlikdan boshlayman. Jamoa hozir juda qiyin holatda. Barchasini tushunib turibmiz. Yigitlar mashg'ulotlarda yaxshi ishtirok etishmoqda, o'yinda esa anchagina qo'pol xatolar qilishmoqda. O'yinni yaxshi boshlagandik. Futbolchilar tartibli o'ynayotgandi, ko'rsatmalarni bajarishayotgandi. Ammo "Neftchi" kabi jamoalar xatolarni kechirmaydi. Sekin o'zimizga kelayotgandik, keyin yana bir qo'pol xato. Keyin yana hisobni tenglashtira oldik. Futbol shunday, vaqt bor ekan, xohish bilan o'ynash, maydonga tushish kerak. Yigitlarga rahmat aytaman, ular o'zlarini o'yinga bahsh qila olishdi va ikki marta hisobni tenglashtirishni uddalashdi. Bugungi holatimizda qo'lga kiritilgan bir ochko oltinga teng. SHu sababli buni yaxshi natija desa bo'ladi. Pochinni ochib oldik. Bu biz uchun ruxiy yuksalish bo'ladi. Ishlashda, mehnat qilishda davom etamiz.

- Ikkala goldagi yaqqol xatoni Stoshich qildi deb hisoblaysizmi?

- Hozir nimadir deyish qiyin. Hozir boshqacha xissiyotlar bor. Miyani bir joyga qo'yib, xotirjamlik bilan vaziyatni ko'rib chiqish kerak.  SHundan keyin vaziyatlarda kimlar xato qilganini aniqlab olamiz.

- Fayzullobek Jumanqo'ziev bugun asosiy tarkibda o'ynamadi. Uning o'yini Sizni qoniqtirmayaptimi?

- Jamoadagi barchaning holati meni qoniqtirmoqda. Hozir shunday holatdamizki, bizga natija kerak. Yani, bizga o'yin sifati muhim emas, asosiysi natija bo'lib turibdi. SHu boisdan ketma-ket ikkinchi yosh Javohirni maydonga tushiryapmiz. Unda tartiblilik, o'yinga etibor yuqori. Bizga shunday jangovar futbolchilar kerak. Tarkibdagi barcha futbolchi menga muhim, ular mening qarorlarimdan xafa bo'lishmayapti. Ular bilan buni muhokama qilib chiqqanmiz. 

- Fuzaylov davrida o'ng qanotda Abdurahmonov, chapda esa Jumanqo'ziev o'ynayotgandi. Sizga demak, qanotdagilarning o'yini maqul kelmagan.

- Taktik sxemani biroz o'zgartirdik. Kim o'yinga tayyor bo'lsa, kuchli holatda tursa o'yinga tushmoqda. Barcha uchun bir xil munosabatdamiz. Hech kimni ajratayotganimiz yo'q. Hurmat qilamiz, qadrlaymiz. 

- Hozir hamma futbolni murabbiy va futbolchidek tushunadigan bo'lib ketgan. 

- Bu borada nimadir deya olmayman. Barchaning o'z fikri bor.