U-17 Jahon chempionati. Intizomli, mustahkam va samarali jamoa - O'zbekistonning bo'lajak raqibi haqida

Biz uchun navbatdagi raqib — yoshlar futbol maktabi va intizomi bilan nom chiqargan Xorvatiya terma jamoasi. Bu bellashuv nafaqat musobaqadagi yo'lni davom ettirish uchun, balki O'zbekiston yoshlar futboli qay darajada o'sganini ko'rsatadigan katta imkoniyatdir.

Tajribali raqib: Xorvatiyaning mundial tarixi

Xorvatiya U-17 terma jamoasi bu safar Jahon chempionatida to'rtinchi marta ishtirok etmoqda.

2001 va 2013 yillarda ular guruh bosqichidan chiqa olmagan.

2015 yilda esa chorak finalgacha etgan — bugunga qadar eng yaxshi natijasi shu hisoblanadi.

Demak, ular bu safar ham ana shu bosqichni kamida takrorlashni, balki uni ortda qoldirishni niyat qilgan.

Xorvatiya futbol tizimida yoshlar tayyorloviga katta etibor beriladi. Ular futbol maktablarida jismoniy tayyorgarlik bilan birga texnik mukammalik, o'yin o'qishi va intizomga alohida ahamiyat qaratishadi. Shuning uchun ham ularning jamoalari, hatto o'smirlar darajasida ham, “kattalarcha” fikrlaydi va jamoaviy harakatda yuksak madaniyat namoyish etadi.

Guruh bosqichi: ishonarli o'yin va mustahkam himoya

Qatardagi Jahon chempionatida xorvatiyaliklar “S” guruhida Senegal, Kosta-Rika va BAA bilan bir kvartetdan o'rin olishdi. Ular guruhda ancha ishonchli o'yin ko'rsatishdi va etti ochko jamg'arib, 1/16 finalga munosib yo'l olishdi.

Guruh bahslari natijalari

Senegal – Xorvatiya 0:0

Mustahkam himoya va intizomli o'yin bilan durang.

BAA – Xorvatiya 0:3

Gollar: Kusanovich, Sivalech, Rados.

Bu uchrashuvda xorvatiyaliklar to'liq ustunlikni namoyish etishdi — nafaqat hisob, balki o'yin tomonlama ham o'zlarini ko'rsatishdi.

Xorvatiya – Kosta-Rika 3:1

Gollar: Rados, Kumar, Kusanovich.

Bu bahsda ular hujumdagi samaradorlik va realizaciya kuchini ko'rsatishdi.

Umuman, 3 ta o'yinda 6 ta gol urgan, bor-yo'g'i 1 ta to'pni darvozasiga kiritib yuborgan jamoa himoya va hujumdagi muvozanatni alo darajada saqlay olganini ko'rsatdi.

Intizom va tartib — Xorvatiya uslubining asosi

Xorvatiya o'smirlari nafaqat texnik, balki intizomli jamoa sifatida ham ajralib turadi. Ular guruh bosqichida bor-yo'g'i 3 ta sariq kartochka olishgan. Bu raqam jamoaning o'yindagi tartibi va xissiy barqarorligini yaqqol ko'rsatadi.

Shu bois, O'zbekiston o'smirlari maydonda nafaqat kuch bilan, balki aql bilan ham o'ynashi lozim bo'ladi. Intizom va diqqatni yo'qotmaslik — bu o'yinning eng muhim omillaridan biri.

O'zbekiston safida kimlarda sariq kartochka bor?

O'zbekiston U-17 terma jamoasi ham guruh bosqichida ishonarli o'yin ko'rsatdi va muxlislarda ishonch uyg'otdi. Endi ularni jiddiy sinov kutmoqda.

Tarkibdagi Miraziz Abdukarimov, Muhammad Habibullaev, Azizbek Abdumo'minov, Jamshidbek Rustamov, Muhammad Hakimov, Sadriddin Hasanov, Muhammadali Musaxonov, Asilbek Aliev va Abdumalik Anvarov kabi yigitlar bu bosqichda javobgarlikni yanada his qilishi kerak bo'ladi, chunki ular hisobida bittadan sariq kartochka bor. 

Eng muhim yangilik — Nurbek Sarsenbaevning safga qaytishi. U-17 Osiyo Kubogi finalida olgan qizil kartochkasi uchun 3 ta o'yinga diskvalifikaciya qilingan Sarsenbaev endi maydonga qaytib, hujumdagi samaradorlikni oshirsa hech gap emas. Uning tezkorligi va hujumdagi xatarli yurishlari raqib himoyasini jiddiy sinovdan o'tkazishi mumkin.

Nimalar hal qiluvchi bo'ladi?

Xorvatiya bilan bahsda bir nechta omil hal qiluvchi ahamiyat kasb etadi:

1. Birinchidan, raqibning himoyadagi intizomiga qarshi sabr va tezkorlik bilan harakat qilish.

2. Ikkinchidan, standart vaziyatlar — ayniqsa burchakdan to'p oshirishlarda diqqatliroq bo'lish lozim. Xorvatiya bu orqali ko'p imkoniyat yaratadi.

3. Uchinchidan, hissiy barqarorlik. Yoshlar musobaqasida ko'pincha xissiyot ustun keladi — bu erda xissiyotni nazorat qilish juda muhim.

Xulosa: imkoniyat bor — faqat ishonish kerak

Xorvatiya jamoasi sinovli raqib, lekin mag'lub etilmas jamoa emas. O'zbekiston o'smirlari keyingi bosqich yo'lini ochish uchun etarlicha kuch, ishonch va birdamlikka ega. Futbolda faqat tajriba emas, yuqori ishtiyoq va ishonch ham g'alaba keltiradi. Bu bellashuv — bizning yoshlarimiz uchun tajriba, katta imkoniyat va buyuk maqsad yo'lida davom etish imkonini beradi.