Statistika aldamaydi yoxud bir yil oldin "Lester" qaysi pog'onada edi?

Bu g'alabadan so'ng Klaudio Raneri boshchiligidagi "tulkilar" Angliya premer-ligasida yana peshqadam bo'lib olishdi. "Lester" bir yil oldin APLda 16ta turdan so'ng 10 ochko bilan musobaqa jadvalining eng so'nggi (!) pog'onasida joylashgandi. Roppa-rosa bir yildan so'ng bu jamoa dunyoning eng tomoshabop ligasida birinchi o'ringa chiqib oldi. Qizig'i o'tgan mavsum shu davrda birinchi o'rinda borgan Londonning "CHelsi" klubi esa bu yil 15 ochko to'plab 16-pog'onada bormoqda. "Lester" bir yil oldin 16ta turda raqiblar darvozasiga bu yil Jeymi Vardi urgan gollar bilan teng miqdorda to'p kiritgan!

Biz Evropaning top-5 chempionatlarini taqqoslab chiqishga qaror qildik. Bir yil oldin xuddi shuncha o'yindan keyin qaysi jamoa qanday pog'onada edi?

APL-2015

APL-2016

O'tgan yil bilan taqqoslasak faqat Evropa top-5 chempionatlarining faqat bittasida peshqadam o'zgarmagan. Bu Germaniya bundesligasidir. "Bavariya" 2015 yilda ham, hozir ham o'z chempionatida katta farq bilan peshqadamlik qilmoqda. Bir yil oldin Dortmundning "Borussiya" klubining ahvoliga havas qilib bo'lmasdi. Klopp boshchiligidagi jamoa 16ta o'yinda 15 ochko to'plab musobaqa jadvalining 16-pog'onasida edi. Hozir esa Tomas Tuxel boshchiligidagi dortmundliklar "Bavariya"ni izma-iz taqib qilib kelishmoqda. Qizig'i 2015 yil "Borussiya" 16ta o'yinda 17ta gol urgandi, 2016 yilgi mavsumda klub hujumchisi Per Emerik Obameyangning bir o'zi 16ta uchrashuvda 18ta to'p kiritdi.

Germaniya-2015

Germaniya-2016

Franciya chempionatida ham o'zgarishlar etarlicha. Bir yil muqaddam chempionatda "Marsel" klubi peshqadamlik qilayotgandi. PSJ ikkinchi o'rinda edi. Hozir Parij klubi katta farq bilan birinchi o'rinda bo'lsa, "Marsel" 9-pog'onani egallab turibdi. Bu yil ikkinchi o'rinda borayotgan "Anje" klubi o'tgan yil ligada umuman yo'q edi. Debyutant jamoa "Monako" bilan bir xil ochko to'plab PSJni quvishda davom etmoqda.

Franciya-2015

Franciya-2016

Appenin yarim orollarida 2015 yil 16ta turdan so'ng "Yuventus" atiga bitta mag'lubiyat bilan yakka peshqadam edi. Ayni paytda turinliklar to'rtinchi pog'onani egallab turishibdi. Rimning "Lacio" klubi o'tgan yil ligada uchinchi edi, hozir esa 12-pog'onada bormoqda. "Milan" barqaror o'yin ko'rsatishda davom etmoqda. Sababi "rossonerlar" bir yil oldin ham hozir ham 25 ochko bilan 7-o'rinda qayd etilgan. Milan shahrining yana bir jamoasi hisoblangan "Inter" esa 2015 yilda 11-o'rinda borayotgandi. Ayni paytda "neradzurrilar" Italiya A seriyasining eng cho'qqisida borishmoqda.

Italiya-2015

Italiya-2016

La Ligada o'tgan yil Madridning "Real" klubi 55ta gol urib, 39 ochko bilan peshqadam edi. Hozir Rafael Benites boshchiligidagi jamoa 32ta gol va 30 ochko bilan uchinchi pog'onada bormoqda. Bir yil oldin "Barselona" 36ta gol va 35 ochko bilan ikkinchi edi. Bu yil ham 15ta turdan so'ng kataloniyaliklar 36ta gol urishdi va 35 ochko jamg'arishdi, lekin jamoa birinchi o'rinda. 2015 yil mavsumning shu davrida 9-o'rinda borgan "Selta" hozir 4-o'rinni egallab turibdi.

Ispaniya-2015

Ispaniya-2016