Sardor Rashidov: "Hozirda keyingi manzilni emas, "Paxtakor"ni o'ylayapman"

Rossiyaning "Ufa" klubi raqiblik qilgan uchrashuvda 1:1 hisobidagi durang natija qayd etildi. "SHerlar"ning yagona goliga yarim himoyachi Sardor Rashidov mualliflik qildi. Bahs yakuniga etgach bevosita Rashidovga bir nechta savollar bilan yuzlandik. 

- O'yin haqida...

- "Ufa" jamoasi bilan o'rtoqlik uchrashuvida ishtirok etdik. Yaxshi o'yin kechdi. Rossiya klubiga qarshi o'z kuchimizni sinab ko'rdik. Hozirda barcha tayyorgarliklar O'zbekiston chempionati va OCHLga qaratilgan. Barcha futbolchilar har tomonlama yaxshi holatga kelishmoqda. 

- Birinchi bo'limdagi harakatlaringizdan jismoniy holatingiz yaxshi ekanligi ko'rindi. So'nggi paytda o'yin amaliyotisiz qolib ketganingizni hisobga olsak optimal formaga kirib olishingiz nima bilan bog'liq?

- Toshkentda "Paxtakor" bilan bir oy juda yaxshi yig'in o'tkazdik. Yangi murabbiy qo'l ostida kerak bo'lsa, uch mahal mashg'ulot olib bordik. Slavche Voyneskining falsafasi bir tomonlama emas, hujumga ham, himoyaga ham etibor beradi. Tartib-intizomga rioya qiladi. 

- Jamoaga kelgan yangi ikki himoyachidan qaysi biri yaxshi taassurot qoldirdi?

- 15 raqamda o'ynagan Kamen chakki taassurot qoldirmadi. Uning tajribasi bizga qo'l keladi. 

- Sardor Rashidov OCHLda muvaffaqiyatli ishtirok etib qaysi manzilni mo'ljallamoqda?

- Hozirda keyingi manzilni emas, "Paxtakor"ni o'ylamoqdaman. Jamoa bilan yaxshi natija ko'rsatmoqchimiz. Bu - O'zbekistonning obro'si, deb o'ylayman.