Ro'ziqul Berdiev: "Andijon"da ruhiy tayyorgarlik ancha pasayganini ko'rdim"

Mezbonlar bosh murabbiyi Azamat Abduraimov matbuot anjumaniga kelmadi.

SHu bois faqat "Nasaf" ustozi Ro'ziqul Berdiev o'z fikrlari bilan o'rtoqlashdi.

- Bugungi o'yinga ham jiddiy tayyorgarlik ko'rgandik. Oldingi uchrashuvdan keyin kam o'yin amaliyotiga ega bo'lgan o'yinchilarimga ham imkoniyat beraman deb aytgandim. Men bugungi o'yin uchun shogirdlarimga minnatdorchilik bildiraman, - deb gap boshladi Berdiev.  

Bugun ular bor kuchlari bilan to'p tepishdi. SHogirdlarimning ayrimlarini jismoniy tayyorgarligi yaxshi emasligini bilib oldim. Lekin bugun jamoam yutuq uchun yaxshi harakat qilishdi. Keyin etibor bergan bo'lsangiz safimizda 17 yoshli o'yinchilar ham maydonga tushishdi. Bu degani biz har doim yoshlarga etibor beramiz va ularga imkoniyat berishda davom etamiz.

- SHerzod Azamovning jarohati u qadar jiddiy emas. Bunday jarohatlar bu o'yinchimizda tez-tez uchrab turadi. SHifokorlarni aytishi bo'yicha hammasi joyida. Keyingi o'yinlarda jamoamizga yordam berishga tayyor.

- Bugun "Andijon" jamoasi ham biz kabi o'yin amaliyoti oz bo'lgan o'yinchilar bilan to'p surdi. Hozir o'yinda shuni guvohi bo'ldimki, jamoada ruhiy tayyorgarlik ancha pasaygan. O'yinchilarda o'ziga bo'lgan ishonch yo'qolib qolgan. Xujumlarni yakunlashda ularda sovuqqonlik etshmayapti. O'ylaymanki, bu vaqtinchalik holat. "Andijon" jamoasida yaxshi futbolchilar yig'ilgan. Keyingi o'yinlarda jamoa maqsad sari dadil qadam tashlashadi deb o'ylayman.

- Albatta biz kubok bahslarida uzoqroqqa borishni maqsad qilganmiz. Keyingi bosqichda biz “Navbahor" jamoasi bilan o'ynaymiz. Namanganliklar bu yil ajoyib o'yin namoyish etyapti. Bu jamoa bilan o'yinga ham jiddiy tayyorgarlik olib boramiz, - deydi Ro'ziqul Berdiev.

Komiljon Ikromov.