PFL - bir qadam oldinda. O'FA hamon jim

Yig'ilishda o'tgan bir yil davomida PFL qancha xarajat qilgani-yu, qancha daromad topgani haqida gap bordi. PFL oldinlari ham yil yakunlariga bag'ishlangan tadbirlar o'tkazardi. Aytaylik, Farhod Magometov paytida turli statistikalar keltirilardi-yu, lekin moliyaviy raqamlar oshkor qilinmasdi. Bu yilgi hisobot esa PFL bosh direktori Diyor Imomxo'jaev takror va takror aytishni xush ko'radigan shaffofligi bilan ajralib turdi. 

Futbolda shaffoflik bo'lgani yaxshi. CHunki futbol bu - xalq o'yini. Bu erda hech qanaqa sir bo'lmasligi kerak. PFLning ochiq moliyaviy hisoboti oshkoralik sari tashlangan katta qadam deb o'ylayman. PFL bu hisobot orqali hamma bilan ochiq ishlashga tayyor ekanini malum qildi. 

Endi esa yurish navbati O'FAga. O'zbekiston futbol associaciyasi ham xuddi PFL kabi ochiq moliyaviy hisobot o'tkazishi lozim bo'ladi. CHunki O'FAga ham beriladigan savollar ko'p: 2021 yilgi mavsum qanday o'tdi? Milliy terma jamoaning JCH saralashdagi muvaffaqiyasizligi keng tahlil qilindimi? Terma jamoalar rahari etib nega aynan Usmon Toshev tayinlandi? Srechko Katanecning maoshi qancha va uning oldiga qanday talablar qo'yilgan? Nima uchun Server Jeparov o'rnini o'smirlar termasida Rauf Inileev egalladi? Rauf Talgatovichning futbolga qarashlari eskirmaganmi? 

Xullas shu va shunga o'xshash savollarga endi O'FA rahbariyatining javob berishiga to'g'ri keladi. Lekin hamma gap bu savollarga javob bera oladigan rahbar bor-yo'qligida. O'FA vice-prezidenti Ravshan Ermatov o'tgan yil hakamlarni yig'ib, juda yaxshi uchrashuv tashkil qildi. Ochiq savol-javoblar bo'ldi. Lekin O'FA nomidan hisobot berishga tayyormi, bu boshqa masala. 

Hozirgi muxlis rahbar faqat tayinlangan kuni OAV bilan uchrashib, boshqa payt jim yurishini xohlamaydi. Hozirgi muxlis juda zukko. Ularga imkon qadar tez-tez hisobot berib turish lozim. O'tgan bir yil ichida amalga oshirilgan ishlar, yutuq va kamchiliklar haqida bilishni kim ham istamaydi deysiz.

Barsa Bloger.