"Paxtakor Junior" loyihasining taqdimot marosimi bo'lib o'tdi

Ushbu loyiha "Paxtakor" futbol klubi va “Junior Soccers Schools” ishtirokida amalga oshirilayotgan bo'lib, “Paxtakor Junior” bolalar va o'smirlar futbol maktablarini ochishdan ko'zlangan maqsad "Paxtakor"ning yurtimizdagi brendini o'stirish, mamlakatimizning barcha hududlarida “Paxtakor Junior” maktablari tarmog'ini yaratish, klub akademiyasiga  istiqbolli va iqtidorli yosh futbolchilarni aniqlash va etkazib  berish, bolalar va o'smirlar futbolini rivojlantirish hamda targ'ib qilishdan iborat. Loyihaning asosiy vazifalari – sog'lom turmush tarzini joriy etish, futbolni rivojlantirish va yosh bolalarni sportga keng jalb etish, maktab va maktabgacha yoshdagi bolalarda jismoniy madaniyatga qiziqishni o'stirish, chekka hududlardagi iqtidorli bolalarning etibordan chetda qolmasligi taminlash sanaladi. "Paxtakor Junior" orqali eng iqtidorli bolalar "Paxtakor" futbol akademiyasiga tanlab olinadi.

Dilshod Karimov ("Paxtakor" futbol klubi raisi o'rinbosari): - Yangi mavsumda "Paxtakor" tarkibini yoshartirish, akademiyaga ko'proq ahamiyat berish haqida klubimiz raisi tomonidan vazifa qo'yilgan. Iqtidorlarni ko'proq izlab topish maqsadida "Paxtakor Yunior" loyihasi ishga tushirilmoqda. Bu orqali nafaqat Toshkent shahri, balki butun mamlakat bo'ylab yoshlar va bolalarni futbolga jalb qilib, ular orasidan eng yaxshilarini akademiyaga tanlab olishga intilamiz. Yurtimizda sport va futbolni ommalashtirishga katta etibor qaratilmoqda. SHunga biz ham o'z hissamizni qo'shish niyatidamiz. Hozircha ushbu maktablardan 4tasi Toshkent shahrida ish boshlaydi. Tez orada boshqa hududlarda ham bu loyiha ishga tushiriladi. Buning yordamida "Paxtakor" futbol klubining brendini yanada ko'tarish ham rejalarimizdan o'rin olgan.

- Ushbu maktablarda barcha yoshlar futbol bilan shug'ullanish imkoniyatiga ega bo'lishadi. Bolalarni qamrab olish chegerasi kattaroq bo'ladi.

SHuhrat Yusupov ("Paxtakor Yunior" loyihasi tasischisi): - Toshkent shahrining Yakkasaroy, Uchtepa, SHayxontohur va CHilonzor tumanlarida maktablar ish boshlaydi. Bosqichma-bosqich loyihani kengaytirib boramiz. Dastlab Toshkent shahrini qamrab olishni rejalashtirganmiz. Keyin esa boshqa hududlarda ham buni ishga tushiramiz. Dastlabki maktablar mart oyida ishga tushishi kutilmoqda. Dastlabki loyiha poytaxtimizdagi "Do'stlik" bog'i hududida ochilishi kutilmoqda.

- Talabdan kelib chiqqan holda ishlaymiz. Marketing tahlilini ko'rib chiqamiz. Birinchi bosqichda 6 yoshdan 10 yoshgacha bo'lgan bolalarni jalb etmoqchimiz. Murabbiylar masalasiga kelsak, "Paxtakor" futbol klubi bilan birgalikda faoliyat ko'rsatamiz. Murabbiylar nomini elon qilib boramiz.

Olim SHokirov ("Paxtakor" FK akademiyasi direktori): - Mashg'ulotni qanday tashkil etish va o'tkazish borasida zarur qo'llanmani taqdim etamiz. Akademiya qanday faoliyat olib borayotgan bo'lsa, "Paxtakor Yunior" loyihasida ham shunday uslubda ishlanadi. Barcha ishlar hamjihat holda olib boriladi.

- Tarbiyalanuvchilarimizga ko'proq etibor berishni istaymiz. Faoliyatimizni o'zgartirib, yanada ko'proq iqtidorli futbolchilarni asosiy jamoa uchun tarbiyalab berishni istaymiz.

Dilshod Karimov: - Avvalgi yili ko'plab futbolchilar "Olimpik" jamoasiga berildi. SHu sababli yoshlar tarkibini kuchaytirish imkoniyati bo'lmadi. Avval akademiyada joy bilan bog'liq muammo bor edi. Yaqinda yotoqxona qurib bitirdik, oshxona bo'yicha muammoni hal qildik. Yana akademiya faoliyatini yaxshilash borasida bir qancha ishlar amalga oshirilmoqda.

SHuhrat Yusupov: - Maktablarda futbolchilar qanday shug'ullanayotgani, undagi ko'rsatkichlarni ota-onalar bevosita platforma orqali kuzatib borishlari mumkin bo'ladi. Maxsus dastur yordamida ularning turli jihatlar bo'yicha qanday o'zgarayotganini bilib olish imkoniyati havola etiladi. Va umuman mashg'ulotlarni ham bemalol kuzatib turishlari mumkin. Barcha ishlar shaffof yo'lga qo'yiladi. Eng iqtidorli bolalar tekinga qabul qilinadi. SHuningdek, kam taminlangan oilalarga imtiyoz taqdim etiladi. Qolganlar uchun esa xizmat pullik bo'ladi.