O'zbekiston U-16 terma jamoasi bosh murabbiyi Sergey Chigodaev: "Muxlislarni CAFA U-17 kubogi finaliga taklif etamiz"

- O'yindan keyingi odatiy savol: o'tgan o'yin haqida qanday fikrdasiz?
- Juda og'ir o'yin. Odatdagidek, o'yinni yomon boshlayapmiz. Avval o'zimizga qiyinchiliklar tug'diramiz, keyin esa ulardan chiqib ketamiz. Yaxshiyamki, yigitlar yig'ilib, nimalarga qodir ekanliklarini ikkinchi bo'limda ko'rsata olishdi. Birinchi bo'limda ham o'yinni nazorat qilgan bo'lsak-da, vaziyatlardan foydalana olmadik. Tanaffusdan keyin raqib ancha charchab qoldi, biz bir nechta o'zgarishlarni amalga oshirdik, o'yinni o'zgartirdik va o'z imkoniyatlarimizdan foydalana oldik.

- Jamoa o'yinlarni yomon boshladi dedingiz. Eron bilan o'yinda ham, Qirg'izistonga qarshi avvalgi uchrashuvda ham shunday bo'lgandi. Sizningcha, bu nima bilan bog'liq?
- Biz buni aniqlashga harakat qilyapmiz. Jamoaga dastlabki daqiqalardan etiborni jamlab o'ynash, diqqatni yo'qotmaslik kerakligini tushuntiramiz. Lekin bolalar hali yosh - katta ehtimol bilan muammo aynan shu bilan bog'liq. Ularda o'yin boshidanoq kerakli tarzda o'ynash uchun hali tajriba va mahorat yo'q. Shu jihat ustida ishlaymiz.

- Eron bilan o'yinda jamoangiz juda ko'p vaziyatlar yaratdi, ammo 75-daqiqagacha to'p darvozaga kirmadi. Bu realizaciyadagi muammolarmi yoki shunchaki omadsizlikmi?
- Baribir gol urishimizga ishonchim komil edi. Yigitlar katta ishtiyoq bilan o'ynashayotgani ko'rinib turardi. Qaerdadir haqiqatan ham shunday bo'ladiki, omad kelmaydi, to'p darvozaga kirmaydi. Ammo o'yindan ko'rinib turibdiki, biz Erondan yaxshiroqmiz.

- Eron terma jamoasi haqida nima deysiz? Jamoa ushbu turnirda mag'lub bo'ldi - Qirg'iziston va O'zbekistonga yutqazib, guruhda so'nggi o'rinni egalladi.
- Eronni Qirg'izistonga qarshi o'yinda ko'rib chiqdik. O'sha o'yinda eronliklar butunlay boshqacha harakat qilishdi: ko'proq to'pni ushlab turishdi, ko'proq "pastdan" o'ynashdi. Aytish mumkinki, ko'proq futbol o'ynadik, qandaydir kombinaciyalar yaratishga harakat qildik. Biz bilan o'yinda Eron terma jamoasi tarkibida uzun paslar ko'proq bo'ldi. Himoyachilarimiz biroz sarosimaga tushib, o'yin boshida orqadan to'p tashlashlardan so'ng ikkita to'p o'tkazib yuborishdi. Ammo, umuman olganda, Erondan ko'proq narsa kutishgan edi, albatta. Bu Osiyo futbolining flagmanlaridan biri. Agar biz g'alaba qozongan bo'lsak, demak, biz yaxshiroq edik.

- Eron terma jamoasi futbolchilarining maydonda intizom borasida qanday harakat qilganiga nima deysiz? Ular juda ko'p yiqilishdi, hakamlar bilan bahslashishdi.
- Qirg'iziston bilan ham shunday bo'lgan. Biz yigitlarni eronliklarning provokaciyalariga uchmasliklari haqida ogohlantirdik. Balki ularga yoshligidan o'rgatishayotgandir yoki bu ularning qonida bordir. Ammo bu futbolga chiroy bag'ishlamaydi va biz futbolchilarimizda bunday narsalarni maqullamaymiz.

- Finalda nimalarni kutyapsiz? Raqib - Tojikiston terma jamoasi haqida qanday fikrdasiz?
- Eronga qarshi o'yin oldidan Tojikiston terma jamoasining Afg'onistonga qarshi o'yinini stadiondan biroz tomosha qildik. Ko'rinib turibdiki, Tojikiston jamoasi juda yaxshi tayyorgarlik ko'rgan, bir nechta yigitlar U-17 Osiyo Kubogida qatnashgan. Umuman olganda, Tojikiston yoshlar va o'smirlar darajasida yaxshi o'yin ko'rsatmoqda. O'sha U-17 Osiyo Kubogida Tojikiston ajoyib ko'rindi, chorak finalda Janubiy Koreyaga qarshi yaxshi o'ynadi va hatto koreyaliklarni mag'lub etishi mumkin edi. Aytish mumkinki, Tojikistonda hozir "futbol bumi" davom etmoqda, so'nggi yillarda juda ko'payib ketdi. Tojikiston terma jamoasini yana bir bor yaxshilab tahlil qilamiz, finalga tayyorgarlik ko'ramiz. Fursatdan foydalanib, muxlislarni CAFA U-17 kubogi finaliga taklif qilmoqchiman. Yigitlar qo'llab-quvvatlansa, ancha yoqimli o'ynashadi, yanada ko'proq harakat qilishadi.