O'zbekiston futzal federaciyasi Polsha futbol federaciyasi bilan hamkorlik qiladi

O'zbekistonning Polshadagi favqulodda va muxtor elchisi Amirsaid Azamxo'jaev hamrohlik qilgan uchrashuv davomida har ikki mamlakat futboli va futzali rahbarlari O'zbekiston futbol associaciyasi hamda mamlakatimiz futzal federaciyasi va Polsha futbol federaciyasi o'rtasida do'stona aloqalarni o'rnatish, ko'plab yo'nalishlar bo'yicha hamkorlikni yo'lga qo'yish borasida kelishib olishdi.

SHuningdek, Bekzod Mamatqulov va Adam Kazmerchyak har ikki mamlakat U-18 va U-20 yosh toifasidagi terma jamoalarni hamda O'zbekistonda ayollar futzalini rivojlantirish bo'yicha samarali hamkorlik qilish borasida kelishib olishdi. Jumladan, kuz faslida O'zbekiston va Polshaning ham erkaklar, ham ayollar terma jamoalari ishtirokida o'rtoqlik uchrashuvlari tashkil etish borasida qaror qabul qilindi.

Uchrashuv so'ngida Adam Kazmerchyak mehmonlarga jahon futboli yulduzi, Polsha milliy terma jamoasi sardori Robert Levandovskining dastxati tushirilgan maxsus futbolkani taqdim etdi.