Otabek Jo'raqo'ziev: "Osiyo Kubogida g'olib chiqib, Stefen Karri kabi nishonlamoqchi edim. Ammo..."

Mezbonlarning yagona goliga Otabek Jo'raqo'ziev mualliflik qildi. Etibor berayotgan bo'lsangiz, golni o'zgacha uslubda nishonlayotgan forvardni ko'rib bevosita basketbol yulduzi Stefan Karri yodimizga tushadi. Xo'sh, Otabek ham unga taqlid qilyaptimi? Hujumchi saytimiz muxbiri Abdulaziz Iskandarovga bergan intervyusida bunga to'xtalib o'tdi. 

- O'yin haqida...

- Barcha guvohi bo'ldi, o'yin juda qiziqarli o'tdi. "Paxtakor"ga ancha muammo tug'dira oldik, deb o'ylayman. Puxta tayyorgarlik ko'rganimiz bilindi. G'alabaga teng durang qayd etdik. 

- Bunday raqiblar bilan o'yinda ishtiyoq hamma narsani hal qilyaptimi?

- Har bir jamoada murabbiy katta rolni o'ynaydi. Superliga grandlaridan ochko olishda davom etmoqdamiz. SHunga yarasha ishtiyoq ham baland. Kerakli natijani qo'lga kiritishga harakat qilmoqdamiz. 

- "Paxtakor" bilan ikki uchrashuvda ham durang o'ynadinglar. Nima, deb o'ylaysiz "Olimpik" qaysi murabbiy boshchiligidagi "Paxtakor"ni yuta olardi?

- Hozir jamoani kuchli yoki kuchsizga ajratadigan payt emas. Har bir murabbiyning qarashlari o'zgacha. 

- "Jar" stadioni qayta tamirdan chiqarildi. "Olimpik" mazkur arenada 2ta uchrashuvda maydonga tushdi. Yangi maydondagi taassurotlar qanday?

- Maydon haqiqatdan ham zo'r holatda. Har bir maydon talablarga javob bersa, to'p tepish osonroq bo'lardi. Yurtimizda yana bir maydon ajoyib holatga kelganidan xursandman. 

- Golni Stefen Karri uslubida nishonlash g'oyasi qachon paydo bo'ldi?

- Uning o'yinlar yoqadi. Qolaversa, o'zim ham basketbolga qiziqaman. Aslida Osiyo Kubogida g'olib chiqib yuqoridagi rasmdagi kabi nishonlab, ijtimoiy tarmoqlarimga joylamoqchi edim. Nasib qilmagan ekan.