OKMKning tunislik legioneri: "Umid qilamanki, yangi mavsumda o'zimni ko'rsata olaman"

Bu O'zbekiston chempionati va olmaliqliklar tarixidagi ikkinchi tunislik futbolchi hisoblanadi. Qizig'i bu boradagi dastlabki qadamni ham OKMK tashlagan, 2014 yil chempionatimizda "konchilar" safida tunislik yarim himoyachi SHaker Zuagi paydo bo'lgandi. Oradan 9 yil o'tib uning hamyurti keldi. Mohammad Salem yangi jamoasi va Turkiya yig'ini haqida quyidagicha fikrlarni bildirdi. 

"O'ylaymanki, yaxshi jamoaga keldim. Ikki xaftalik yig'in ko'ngildagidek o'tdi, deya olaman. 5ta nazorat uchrashuvida maydonga tushdik. Natijalar turlicha bo'ldi. 

OKMKda hammasi professional holatda tashkil etilgan. Futbolchilar, murabbiylar haqida fikrlarim ijobiy. Moslashishda qiynalmayapman. O'zbekiston chempionatida avval ham tunislik SHaker Zuagi o'ynaganidan xabarim bor. Uni muxlislar hamon eslab turishlari haqida aytishdi. Umid qilamanki, oldindagi mavsumda men ham o'zimni ko'rsatib yaxshi nom qoldirishga harakat qilaman",- deydi Mohammad Salem.