OFK UEFAdan aqlli. Nega?

Ko'pchilik mutaxassislar va muxlislar pley-off uchrashuvlaridagi mehmondagi gol qoidasini tanqid qilishadi. Ayniqsa qo'shimcha taymlarga o'tgach ham bu qoida o'z kuchini yo'qotmaydi. Natijada birinchi o'yindagi tafovutni yo'qqa chiqargan jamoa yana qo'shimcha 30 daqiqa o'sha qoidadan aziyat chekishi mumkin.

Kecha "Zenit" jamoasi o'z uyida "Dinamo" Minsk ustidan chiroyli g'alabaga erishdi va Evropa ligasi kvalifikaciyasining keyingi raundiga yo'l oldi.

Ushbu jamoalarning dastlabki bellashuvida Belarus klubi "Zenit"ni o'z uyida 4:0 hisobida tor-mor keltirgandi. Kecha esa "Petrovskiy"da o'tgan bahsda "Zenit" yuksak iroda namoyish etdi va 90 daqiqa ichida o'rtadagi farqni yo'qqa chiqara oldi.

Natijada jamoalar g'olib nomini qo'shimcha 30 daqiqa yoki penaltilar seriyasi orqali aniqlashlariga to'g'ri keldi. "Dinamo" Minsk esa qo'shimcha bo'limlarning dastlabkisida gol kiritishga muvaffaq bo'ldi. "Zenit" esa safardagi gol qoidasi tufayli keyingi bosqichga chiqish uchun yana ikkita gol urishi talab etilardi. "Zenit" amalda buni uddaladi. Ammo uchrashuvdan keyin jamoa bosh murabbiyi Sergey Semak safardagi gol qoidasi qo'shimcha taymlarda ham o'z kuchida qolishini keskin tanqid qildi.

"Mantiqsiz qoida tufayli yana qiyin ahvolga tushib qoldik. Safarda va uyda o'tkazilgan 90 daqiqadan so'ng mehmondagi gol qoidasi o'z kuchini yo'qotishi kerak! Bu nohaqlik! SHaroit barcha jamoalar uchun teng bulmog'i lozim. SHunga qaramay futbolchilarim qahramonlik ko'rsatishdi va ajoyib "kambek"ni amalga oshirishdi. "Zenit" bilan faxrlanaman", - dedi Sergey Semak.

UEFAda safardagi gol qoidasi qo'shimcha bo'limlarda ham o'z kuchini yo'qotmaydi. Ammo OFKda bu mantiqsiz qoida ancha yillar oldin bekor qilingan. OCHL o'yinlarida safardagi gol qoidasi qo'shimcha taymlarda o'z kuchini yo'qotadi.