Odil Hamrobekov: “Murabbiylar ishonchini oqlashga harakat qilaman”

Etiborli tomoni u Osiyo chempionlari ligasi musobaqasida debyut o'yinini o'tkazayotganiga qaramay, maydonda o'ta ishonchli harakat qildi. O'yindan keyin “Nasaf” ustozi bu futbolchining harakatlari haqida alohida to'xtalib o'tdi. Hamrobekov klub rasmiy veb-saytiga o'yin haqidagi fikrlari bilan o'rtoqlashdi.

- OCHL bahslarida oddiy raqib bo'lmasligini barcha biladi. O'yin oldin raqibimiz ishtirokidagi o'yinlarni jiddiy o'rganib, murabbiy barchamizga kerakli ko'rsatmalarni bergan edi. Ochig'i, asosiy tarkibda tushganimdan judayam xursand bo'ldim va murabbiyimiz ko'rsatmalarini bekamu ko'st bajarishga urindim. Vazifam – raqib hujumini maydon markaziga yaqin joyda “buzish” edi.  To'g'ri, birinchi bo'limda unchalik o'yinmiz qovushmadi. Mavsumning birinchi rasmiy o'yini, qolaversa bir kun oldin yoqqan yog'ingarchilik tufayli maydonning holatiyam bizni biroz ehtiyotkorlikka undadi. Ammo ikkinchi bo'limdagi ikkita tezkor gol bizga katta madad bo'ldi. SHu bois ikkinchi 45 daqiqalikda ko'proq jamoa hujumlariga ham qatnashib turdim.

 
-Raqibning etakchi o'yinchisi Eron milliy terma jamoasi azosi Adrianik Teymuryan bilan maydonda bir necha marotaba to'qnash keldinglar. U haqda qanday fikrdasiz?

 
-Ilgari o'smirlar o'rtasida Osiyo chempionatida qatnashgan bo'lsamda, OCHL bu umuman boshqa saviyadagi turnir ekanligiga bevosita guvoh bo'ldim. To'g'ri, o'yin davomida ko'p marta “Traktorsozi” etakchisiga qarshi kurash olib bordim. Bu kabi tajribali futbolchilarga qarshi o'yinlar men uchun maktab vazifasini o'tab beradi. Bu kabi o'yinlarda jamoadoshlarimni qo'llab-quvvatlashi men uchun muhim. Kechagi uyinda ular bu borada menga katta yordam berishdi.  Buning uchun barchaga rahmat deyman. Nasib etsa keyingi o'yinlarda ham murabbiyimiz ishonchini oqlash uchun harakat qilaman.