Odil Ahmedov: "Katta yo'lga chiqdik!"

Raqib kubok uchun asosiy davogarlardan biri – "Navbahor". Bahs oldidan klub rahbari Odil Ahmedov bilan qisqacha suhbatlashdik.

- Yil boshida 2 nafar futbolchimiz Pro ligadagi "Lokomotiv" va "Paxtakor" U-21 jamoalari safiga borib qo'shildi. Qolgan o'yinchilarni ham shakllantirish maqsadida Birinchi ligaga jamoa qo'yishga qaror qildik. Natijada 6 yil avval tashkil qilgan akademiyamiz, bugun Olimpiya zaxiralari kolleji bilan hamkorlikda katta klubga aylana oldi. Biz joriy mavsum PFL Birinchi ligasiga jamoa qo'yish bilan birga, kubok saralash o'yinlarida ham qatnashdik. Dastavval jamoa "Qumqo'rg'on-1977" jamoasini mag'lubiyatga uchratdi, keyin "Jayxun"dan ustun keldi. SHundan so'ng biz "Andijon", "Navbahor" va "Olimpik" jamoalari o'rin olgan guruhdan joy oldik. 

- Jamoa uy o'yinilarini qaysi arenada o'tkazadi?

- SHu o'rinda, O'zbekiston yoshlar siyosati va sport vazirligi qoshidagi Respublika olimpiya va paralimpiya zaxiralari kollejiga o'z minnatdorchiligimni bildirib o'tsam. Aynan shu dargoh bilan hamkorlikda ishlab kelyapmiz. O'zim ham shu maktab tarbiyalanuvchisiman. Biz o'qib yurgan kezlarimizda bu erdagi stadionda Ikkinchi liga uchrashuvlari bo'lar va men guruhdoshlarim bilan barcha o'yinlarni tomosha qilardik. Mana shu ananani tikladik, endi bu erdagi stadionga katta futbol qaytdi. Uy o'yinlarimizni aynan shu arenada o'tkazamiz. FIFA talablariga to'liq javob beradigan ikkinchi stadionimizni ham qurilish ishlari bitib qoldi. Bu haqda keyinroq batafsil, o'sha erda gaplashamiz.

- Ertangi o'yin haqida nima deysiz?

- Tarkibimiz negizi 2006 yilda tavallud topgan futbolchilardan iborat. Maqsadimiz – ularni katta futbolda chiniqtirish. O'zbekiston Kubogi bizning yosh tarbiyalanuvchilar uchun juda katta tajriba maydoni. Eng asosiy vazifamiz – futbolchilarimizni Superliga jamoalariga tayyorlab berish.

Eslatib o'tamiz, ertangi uchrashuv Toshkentdagi ROZK stadionida 16:45 da start oladi.